អាមេរិក ចង់គិតលុយពីអ៊ុយក្រែន សម្រាប់សព្វាវុធដែលបញ្ជូនទៅ

ឧបការីរដ្ឋមន្ត្រីការពារជាតិអាមេរិកទទួលបន្ទុកកិច្ចការសន្តិសុខអន្តរជាតិ លោកស្រី Celeste Wallander បានប្រាប់សភាកាលពីថ្ងៃពុធទី០១ខែមីនាថា អ៊ុយក្រែន គួរតែចំណាយប្រាក់សម្រាប់អាវុធមួយចំនួនដែលខ្លួនទទួលបានពីអ្នកគាំទ្រលោកខាងលិច។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ស្របពេលជាមួយគ្នានោះ តំណាងរាស្រ្តគណបក្សសាធារណរដ្ឋរដ្ឋកាលីហ្វ័រញ៉ា លោក Michael Garcia បាននិយាយក្នុងសវនាការរបស់គណៈកម្មាធិការសភាថា វានឹងមានសារសំខាន់សម្រាប់សហរដ្ឋអាមេរិក ក្នុងការផ្តួចផ្តើមការលក់គ្រឿងសឹកបរទេសទៅឲ្យអ៊ុយក្រែន ជាជាងការផ្តល់សព្វាវុធដល់ទីក្រុងកៀវដោយឥតគិតថ្លៃ។ លោកអះអាងថា ការធ្វើបែបនេះនឹងក្លាយជាដំណើរដ៏វែងឆ្ងាយជាមួយអ្នកបង់ពន្ធអាមេរិក។

ងាកទៅលោកស្រី Wallander ឯណោះវិញ លោកស្រីបានលើកឡើងថា ថ្វីបើអ៊ុយក្រែន ពិតជាបានទិញអាវុធខ្លះដោយខ្លួនឯងក៏ពិតមែន ប៉ុន្តែពួកគេមិនបានទិញសព្វាវុធក្នុងទំហំធំណាមួយពីក្រុមហ៊ុនអាមេរិកទេ។

លោកស្រីនិយាយថា “ពេលនេះ ពួកគេមិនមានសមត្ថភាពគ្រប់គ្រាន់ក្នុងកញ្ចប់ថវិការបស់ពួកគេឡើយ ប៉ុន្តែវាជាចំណុចល្អមួយដែលយើងត្រូវផ្លាស់ប្តូរពួកគេ ដើម្បីចាប់ផ្តើមផែនការចំណាយលើវិស័យការពារជាតិរបស់ពួកគេ ក៏ដូចជាអ្វីៗផ្សេងទៀតដែលយើងនឹងធ្វើដើម្បីគាំទ្រពួកគេ”។

គួរបញ្ជាក់ថា ចាប់តាំងពីផ្ទុះជម្លោះនៅអ៊ុយក្រែនកាលពីជាងមួយឆ្នាំមុនមក សហរដ្ឋអាមេរិកបានសន្យាផ្តល់ជំនួយសន្តិសុខជាង៣១.៧ពាន់លានដុល្លារ ដើម្បីគាំទ្រដល់ទីក្រុងកៀវ រួមទាំងរថក្រោះ M1 Abrams, កាំភ្លើងធំ និងប្រព័ន្ធប្រឆាំងយន្តហោះរាប់ពាន់គ្រឿងផងដែរ។ ទោះបីជាយ៉ាងណាក៏ដោយ រុស្ស៊ី​បាន​ព្រមាន​ម្តង​ហើយ​ម្តង​ទៀត​ថា ការ​បញ្ជូន​អាវុធ​ទៅ​អ៊ុយក្រែន​នឹង​អូសបន្លាយ​ជម្លោះឲ្យកាន់តែយូរ៕

ប្រែសម្រួល៖ Vann Vann

ប្រភព៖ RT

ចុចអាន៖ អាមេរិក ទទួលស្គាល់ថា ខ្លួនពិបាកតាមដានសព្វាវុធ ដែលបញ្ជូនទៅអ៊ុយក្រែន