បណ្ដាញអ៊ីនធឺរណិតកូរ៉េខាងត្បូងកំពុងជជែកវែកញែកគ្នាយ៉ាងក្តៅគគុក បន្ទាប់ពីលោក Kim Sung Han ទីប្រឹក្សាសន្តិសុខជាតិលាលែងពីតំណែង ពាក់ព័ន្ធនឹងការអញ្ជើញ BLACKPINK ឱ្យទៅសម្តែងក្នុងពិធីជប់លៀង នៅសហរដ្ឋអាមេរិក។

យោងតាមសេចក្តីរាយការណ៍ ជំទាវទីមួយ Jill Biden បានផ្តល់សំណើអញ្ជើញក្រុម BLACKPINK ស្នើសុំឱ្យសម្តែងជាមួយតារាចម្រៀង Lady Gaga ក្នុងពិធីជប់លៀងថ្នាក់រដ្ឋ ដែលលោកប្រធានាធិបតី Biden គ្រោងនឹងធ្វើជាម្ចាស់ផ្ទះ នៅពេលលោកប្រធានាធិបតីកូរ៉េ Yoon នឹងធ្វើទស្សនកិច្ចនៅវ៉ាស៊ីនតោន នៅខែមេសាខាងមុខ។

នៅក្នុងកម្មវិធីព័ត៌មានទូរទស្សន៍មួយលាតត្រដាងថា ខណៈមន្ត្រីជាច្រើននៅក្នុងជួររដ្ឋាភិបាលដឹងអំពីសំណើជំទាវទីមួយ Jill Biden លោកប្រធានាធិបតីបែរជាមិនត្រូវបានជូនដំណឹងនោះទេ ហើយនៅពេលលោក​ដឹង​ដំណឹង​នេះក្រោយគេ ​លោកទំនងជាខឹង​សម្បារ។

ទោះជាយ៉ាងណា របាយការណ៍បានអះអាងដែរថា ការលាលែងតំណែងរបស់ទីប្រឹក្សាសន្តិសុខ ប្រហែលមិនមែនមកពីករណីការខឹងសម្បាររបស់ប្រធានាធិបតីឡើយ ​ព្រោះលោក Kim Sung Han បានលាលែងពីតំណែងកាលពីម្សិលមិញ ក្នុងទម្រង់នៃការលាលែងដោយស្ម័គ្រចិត្ត។

ជាមួយគ្នានោះ សេចក្ដីរាយការណ៍ពីទូរទស្សន៍បានបញ្ចប់ថា ប្រសិនបើមន្ត្រីត្រូវលាលែងពីតំណែង ដោយសារបញ្ហាជាមួយ K-Pop មែននោះ វាជាដំណោះស្រាយមិនល្អនោះទេ ហើយវានឹងឆ្លុះបញ្ចាំងយ៉ាងអាក្រក់អំពីរដ្ឋាភិបាល។ យ៉ាងណាក្ដី រឿងពិតមិនទាន់មាននរណាទម្លាយច្បាស់ការណ៍នៅឡើយទេ៕

ប្រែសម្រួល៖ សន្យា

ចុចអាន៖ BLACKPINK កំពុងពិចារណាការសម្ដែង នៅឯពិធីជប់លៀងរបស់ប្រធានាធិបតីអាមេរិក លោក Joe Biden

ចុចអាន៖ Billie Eilish ផ្លាស់ចេញពីគ្រួសារ ទៅរស់នៅផ្ទះតម្លៃជាង ២លានដុល្លារ