រុស្ស៊ី នឹងដាក់អាវុធនុយក្លេអ៊ែរនៅ បេឡារុស ជាប់មាត់ទ្វារព្រំដែនជាមួយ ណាតូ

ឯកអគ្គរដ្ឋទូតរុស្ស៊ីប្រចាំប្រទេសបេឡារុសលោក បូរីស ហ្គ្រីស្លូវ (Boris Gryzlov) បាននិយាយថា រុស្ស៊ីនឹងដាក់អាវុធនុយក្លេអ៊ែរយុទ្ធសាស្ត្រនៅក្នុងប្រទេសបេឡារុស ជាប់មាត់ទ្វារព្រំដែនជាមួយប្រទេសណាតូ ស្របពេលដែលមានភាពតានតឹងកាន់តែពុះកញ្ជ្រោលជាមួយលោកខាងលិច ។

លោក ហ្គ្រីស្លូវ បាននិយាយកាលពីថ្ងៃអាទិត្យថា “អាវុធនុយក្លេអ៊ែរនឹងត្រូវចល័តទៅកាន់ព្រំដែនភាគខាងលិចរបស់ប្រទេសបេឡារុស ដើម្បីធានាសន្តិសុខរបស់ខ្លួន ហើយរុស្ស៊ីមិនខ្វល់ពីការរំខាន ឬផលប៉ះពាល់ណាមួយនៅក្នុងទ្វីបអឺរ៉ុប និងសហរដ្ឋអាមេរិកនោះទេ” ។

ការអត្ថាធិប្បាយរបស់ប្រេសិតរុស្ស៊ីរូបនេះធ្វើឡើង បន្ទាប់ពីលោកប្រធានាធិបតី វ្ល៉ាឌីមៀរ ពូទីន កាលពីខែមុនបានប្រកាសពីផែនការដាក់ពង្រាយអាវុធនុយក្លេអ៊ែរយុទ្ធសាស្ត្រនៅក្នុងប្រទេសបេឡារុស ខណៈដែលការរៀបចំនឹងត្រូវបញ្ចប់ត្រឹមថ្ងៃទី ១ ខែកក្កដា ខាងមុខនេះ ។

ពាក់ព័ន្ធនឹងបញ្ហានេះដែរ ប្រធានាធិបតីបេឡារុសលោក អាឡិចសាន់ឌឺ លូកាសិនកូ (Alexander Lukashenko) ដែលជាសម្ព័ន្ធមិត្តជិតស្និទ្ធបំផុតមួយរបស់លោក ពូទីន ក៏បានលើកឡើងកាលពីថ្ងៃសុក្រដែរថា រុស្ស៊ីអាចដាក់ពង្រាយអាវុធនុយក្លេអ៊ែរយុទ្ធសាស្ត្រ និងទីតាំងឃ្លាំងអាវុធនុយក្លេអ៊ែរមួយចំនួននៅលើទឹកដីរបស់បេឡារុស ប្រសិនជាស្ថិតក្នុងស្ថានភាពចាំបាច់ ។

គួរបញ្ជាក់ថា បេឡារុស មានព្រំប្រទល់ជាប់ជាមួយប្រទេសលីទុយអានី ឡាតវី និងប៉ូឡូញ ដែលសុទ្ធតែជាសមាជិករបស់អង្គការណាតូ ដែលជាសម្ព័ន្ធមិត្តយោធាបង្កើតឡើង ដើម្បីរារាំងការពង្រីកទឹកដីរបស់សូវៀតនៅអឺរ៉ុប បន្ទាប់ពីសង្គ្រាមលោកលើកទី ២ ៕

ប្រែសម្រួលដោយ ៖ ជិវ័ន្ត

ប្រភព ៖ Al Jazeera

ចុចអាន ៖ រុស្ស៊ី ចេញគោលនយោបាយថ្មី បង្កើតសម្ព័ន្ធប្រឆាំងលោកខាងលិច និង ពង្រឹងទំនាក់ទំនងជាមួយ ចិន