បន្ទាប់ពីម្ចាស់ស្លាប់ សុនខមួយក្បាលនៅអង់គ្លេសក្លាយជាសត្វប្រមឹក

ឆ្កែឈ្មោលកូនកាត់ពូជ Labrador មួយក្បាលនៅទីក្រុង Plymouth ភាគខាងលិចប្រទេសអង់គ្លេស បានទទួលការព្យាបាលផ្ដាច់ជាតិស្រវឹងក្រោយម្ចាស់បាត់បង់ជីវិត ។ ឆ្កែ Coco អាយុ ២ ឆ្នាំបានមកដល់មជ្ឈមណ្ឌលសុខុមាលភាពសត្វ Woodside ជាមួយឆ្កែមួយក្បាលទៀតក្នុងសភាពឈឺធ្ងន់និងប្រកាច់ចាប់មិនឈ្នះ ។

ទោះជាពេទ្យសត្វព្យាយាមមើលថែដៃគូ Coco ជាងគេក៏ដោយ វានៅតែមិនអាចសង្គ្រោះបានព្រោះសភាពធ្ងន់ហើយប្រកាច់ច្រើនមុន Coco ទៅទៀត ។ ក្នុងដំណើរការព្យាបាល Coco ត្រូវពេទ្យដាក់ថ្នាំសណ្ដំ ៤ សប្ដាហ៍ដើម្បីគ្រប់គ្រងស្ថានភាពរបស់វាដែលធ្វើទុក្ខខ្លាំងដោយសារការបញ្ចេញជាតិអាល់កុលពីរាងកាយ ។

បច្ចុប្បន្នឆ្កែដ៏គួរឲ្យស្រលាញ់ខាងលើមិនមានទទួលការព្យាបាលអ្វីទៀតទេ ហើយវាកំពុងចាប់ផ្ដើមជីវិតថ្មីដោយការស្វែងរកម្ចាស់ទីពីរផងដែរ ។ ចំណែកមូលហេតុឈានដល់ការញៀនគ្រឿងស្រវឹងក៏មិនមានអ្នកដឹងច្បាស់ដែរ ប៉ុន្តែគេសន្និដ្ឋានថាវាលួចផឹកស្រារបស់ម្ចាស់ពេលគាត់ភ្លេចខ្លួនរហូតដល់ញៀន ។

សូមបញ្ជាក់ដែរថា ម្ចាស់ថ្មីត្រូវតែមានលំនៅដ្ឋានក្បែរមជ្ឈមណ្ឌលសុខុមាលភាពសត្វដើម្បីតាមដានសុខភាពរបស់ Coco ព្រោះវាមានសុខភាពទន់ខ្សោយខ្លាំងនៅឡើយ ៕

ប្រភព ៖ scmp

ចុចអាន ៖ អាហារ ៩ ប្រភេទ ជាថ្នាំពុលសម្រាប់សត្វឆ្កែ