រុស្ស៊ី បង្កើតទ័ពពិសេសដើម្បីកម្ទេចរថក្រោះរបស់លោកខាងលិចនៅ អ៊ុយក្រែន

ប្រធានមជ្ឈមណ្ឌលហ្វឹកហ្វឺនការប្រយុទ្ធរបស់រុស្ស៊ីលោក Yevgeny Arifulin បាននិយាយកាលពីថ្ងៃអាទិត្យថា កងកម្លាំងប្រដាប់អាវុធរុស្ស៊ីស្ថិតក្រោមការគ្រប់គ្រងរបស់ក្រសួងការពារជាតិ បានចាប់ផ្តើមបង្កើតក្រុមពិសេសមួយ ទទួលបន្ទុកបំផ្លាញរថក្រោះរបស់បណ្តាប្រទេសលោកខាងលិចដែលផ្គត់ផ្គង់ដល់ទីក្រុងកៀវ ។

លោក Arifulin បានប្រាប់ទូរទស្សន៍រុស្ស៊ីថា “ការងារនេះត្រូវបានរៀបចំឡើងតាមការណែនាំរបស់អនុរដ្ឋមន្ត្រីការពារជាតិគឺលោកវរសេនីយ៍ឯក Yunus-Bek Yevkurov ដែលបានកំណត់ភារកិច្ចយ៉ាងជាក់លាក់នៃការបង្កើតក្រុមទាំងនេះ ។ ចំណែកលោកវរសេនីយ៍ឯក Ivan Buvaltsev គឺជាអ្នកចាត់ចែងក្រុមបង្កើត និងរៀបចំវិធីសាស្ត្រសម្រាប់ការអនុវត្ត” ។

លោក​ Arifulin បាននិយាយថា “យើងដឹងពីភាពខ្លាំង និងភាពទន់ខ្សោយនៃរថក្រោះរបស់លោកខាងលិច ហើយកងទ័ពរុស្ស៊ីក៏កំពុងសិក្សាស៊ីជម្រៅបន្ថែមទៀតផងដែរលើសព្វាវុធទាំងនេះ ជាពិសេសរថក្រោះអាមេរិក Abrams, រថក្រោះខ្លារខិន Leopard 2 របស់អាល្លឺម៉ង់, រថក្រោះ Leclerc របស់បារាំង និងរថក្រោះ Challenger របស់អង់គ្លេស ។

ចាប់តាំងពីផ្ទុះប្រតិបត្តិការសឹករបស់រុស្ស៊ីនៅអ៊ុយក្រែនកាលពីឆ្នាំមុនមក បណ្តាប្រទេសលោកខាងលិចបាននឹងកំពុងផ្គត់ផ្គង់ប្រព័ន្ធសព្វាវុធជាច្រើនប្រភេទទៅឲ្យរដ្ឋាភិបាលទីក្រុងកៀវ ដែលក្នុងនោះរួមមានទាំងកាំជ្រួចមីស៊ីលការពារដែនអាកាស ប្រព័ន្ធរ៉ុកកែតបាញ់ច្រើនគ្រាប់ រថក្រោះ កាំភ្លើងធំបាញ់ស្វ័យប្រវត្តិ និងកាំភ្លើងបាញ់ប្រឆាំងយន្តហោះជាដើម ។

ពាក់ព័ន្ធនឹងបញ្ហានេះដែរ វិមានក្រឹមឡាំងបានព្រមានម្តងហើយម្តងទៀតប្រឆាំងនឹងការបន្តផ្តល់អាវុធបែបនេះដល់ទីក្រុងកៀវ ហើយបានចាត់ទុកទង្វើនេះថាជា ការអូសបន្លាយសង្គ្រាម មិនមែនចង់បញ្ចប់ជម្លោះឲ្យបានឆាប់នោះទេ ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ រុស្ស៊ី ថា ព្រោះតែបដិវត្តន៍ពណ៌របស់ អាមេរិក ទើបផ្ទុះសង្គ្រាមនៅ អ៊ុយក្រែន