សមាជិកសភា អាមេរិក ឲ្យលោក Biden ផ្ដល់គ្រាប់បែកចង្កោមទៅអ៊ុយក្រែន ដើម្បីចង់ដឹងពីប្រសិទ្ធភាព

សមាជិកសភាអាមេរិកលោក Joe Wilson បាននិយាយកាលពីថ្ងៃពុធថា រដ្ឋបាលលោក Joe Biden គួរតែពិចារណាផ្តល់គ្រាប់បែកចង្កោមឲ្យអ៊ុយក្រែន ដើម្បីប្រើទប់ទល់នឹងកងកម្លាំងរុស្ស៊ីដែលកំពុងធ្វើប្រតិបត្តិការសឹកនៅអ៊ុយក្រែន ។

លោក Wilson បាននិយាយក្នុងសភាថា “យើងគួរតែពិចារណាផ្ដល់គ្រាប់បែកចង្កោមឲ្យអ៊ុយក្រែន ដើម្បីកំណត់ និងចង់ដឹងពីប្រសិទ្ធភាពរបស់អាវុធប្រភេទនេះលើសមរភូមិ ស្របពេលដែលជម្លោះជាមួយរុស្ស៊ី កាន់តែអូសបន្លាយពេល” ។

សមាជិកសភាមកពីគណបក្សសាធារណរដ្ឋរូបនេះបានបញ្ជាក់ថា បច្ចុប្បន្នអាមេរិកមានស្តុកគ្រាប់បែកចង្កោមចំនួន ២ លានគ្រាប់ ហើយលោកសង្ឃឹមថា រាល់កិច្ចខិតខំប្រឹងប្រែងនេះ នឹងត្រូវបានធ្វើឡើងដើម្បីពិនិត្យមើលការផ្តល់គ្រាប់បែកចង្កោមដែលយើងមានទៅដល់សមរភូមិនៅអ៊ុយក្រែន” ។

គួរបញ្ជាក់ថា នេះមិនមែនជាលើកទី ១ ទេ ដែលសមាជិកសភាអាមេរិកបានអំពាវនាវឲ្យរដ្ឋបាលលោក Joe Biden បញ្ជូនគ្រាប់បែកចង្កោមទៅកាន់រដ្ឋាភិបាលទីក្រុងកៀវ ដើម្បីទុកសម្រាប់ប្រើប្រឆាំងនឹងសង្គ្រាមលុកលុយរបស់រុស្ស៊ីដែលអូសបន្លាយពេលជាង ១ ឆ្នាំមកនេះ ។

ទន្ទឹមនោះ កាលពីខែមីនា ក្រុមសមាជិកសភាមកពីគណបក្សសាធារណរដ្ឋក៏បានផ្ញើលិខិតមួយច្បាប់ទៅលោក Joe Biden ដោយជំរុញឲ្យប្រធានាធិបតីរូបនេះបញ្ជូនគ្រាប់បែកចង្កោមទៅឲ្យអ៊ុយក្រែនសម្រាប់ប្រើប្រាស់លើសមរភូមិ ចំពេលមានប្រតិបត្តិការសឹករបស់រុស្ស៊ីនៅទីនោះ ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ អាមេរិក អន់ចិត្តជាមួយ រុស្ស៊ី ដែលមានអាវុធល្បឿនលឿនជាងសំឡេង​ទំនើបជាង