ហ្វីលីពីន ធានាដល់ចិន ថា មូលដ្ឋានទ័ពអាមេរិកថ្មីលើដីរបស់ខ្លួន នឹងមិនត្រូវប្រើដើម្បីវាយប្រហារនរណាម្នាក់ឡើយ 

ប្រធានាធិបតីហ្វីលីពីនលោក Ferdinand Marcos Jr. បានធានាដល់រដ្ឋមន្ត្រីការបរទេសចិនលោក Qin Gang ថា មូលដ្ឋានទ័ពអាមេរិកថ្មីចំនួន៤ ដែលនឹងត្រូវសាងសង់នៅក្នុងប្រទេសហ្វីលីពីន គឺនឹងមិនត្រូវបានប្រើប្រាស់ដើម្បីវាយប្រហារនរណាម្នាក់ឡើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Marcos បានប្រាប់បទសម្ភាសនៅមជ្ឈមណ្ឌលសិក្សាយុទ្ធសាស្ត្រ និងអន្តរជាតិ (CSIS) កាលពីថ្ងៃព្រហស្បតិ៍ទី០៤ខែឧសភាថា “ខែមុន ហ្វីលីពីនបានផ្តល់មូលដ្ឋានថ្មីចំនួន៤ដល់អាមេរិក។ សហរដ្ឋអាមេរិក មិនដែលបានលើកឡើងពីលទ្ធភាពដែលទីតាំងទាំងនេះ នឹងត្រូវបានប្រើដើម្បីវាយប្រហារនរណាម្នាក់នោះទេ។ នោះមិនមែនជាគោលបំណងនៃទីតាំងទាំងនេះឡើយ ពួកគេនឹងមិនប្រើក្នុងវិធីនេះទេ”។

ស្របពេលជាមួយគ្នានោះ លោកបន្ថែមថា ហ្វីលីពីន និងសហរដ្ឋអាមេរិក បានព្រមព្រៀងក្នុងការបង្កើនសមយុទ្ធយោធារួមគ្នានៅក្នុងតំបន់ ជាមួយនឹងគោលដៅនៃការបង្កើនភាពរហ័សរហួន និងការឆ្លើយតបរហ័សចំពោះការគំរាមកំហែងដែលកំពុងកើតឡើង ចំពេលមានភាពតានតឹងកាន់តែខ្លាំងរវាងចិន និងប្រជាជាតិទាំងពីរ។

លោក Marcos ក៏និយាយដែរថា សហរដ្ឋអាមេរិកមិនបានស្នើសុំឲ្យហ្វីលីពីនផ្តល់កម្លាំងយោធាណាមួយនៅក្នុងករណីផ្ទុះសង្រ្គាមរវាងសហរដ្ឋអាមេរិក និងចិនលើកោះតៃវ៉ាន់ឡើយ។

នៅពេលលោក Marcos ត្រូវបានគេសួរថាតើរដ្ឋបាលលោក ចូ បៃដិន បានស្នើសុំកងកម្លាំងយោធាហ្វីលីពីនដែរឬទេក្នុងករណីអាមេរិកផ្ទុះជម្លោះជាមួយចិន ជុំវិញស្ថានភាពតៃវ៉ាន់, លោក Marcos បានឆ្លើយតបថា “ទេ”។

លោក Marcos លើកឡើងថា ហ្វីលីពីននិងចិន ក៏កំពុងឈានបន្តិចម្តងៗឆ្ពោះទៅរកដំណោះស្រាយនៃការខ្វែងគំនិតគ្នាអំពីការគ្រប់គ្រង និងអធិបតេយ្យលើតំបន់ប្រេង និងឧស្ម័ននៅសមុទ្រចិនខាងត្បូងផងដែរ។

គួរបញ្ជាក់ថា នៅក្រោមការដឹកនាំរបស់រដ្ឋបាលលោក បៃដិន, ទំនាក់ទំនងអាមេរិក-ហ្វីលីពីនបានពង្រឹងឡើងវិញបន្ទាប់ពីទីក្រុងម៉ានីល បានដកខ្លួនពីជំហរយុទ្ធសាស្ត្របរទេស ក្រោមការដឹកនាំរបស់អ្នកកាន់តំណែងមុន៕

ប្រែសម្រួល៖​ Vann Vann

ប្រភព៖ Sputnik

ចុចអាន៖ ហ្វីលីពីន មិនអនុញ្ញាតឲ្យអាមេរិក យកមូលដ្ឋានរបស់ខ្លួន ធ្វើជាកន្លែងបើកប្រតិបត្តិការ ប្រឆាំងចិន