អាមេរិក ថា រុស្ស៊ី ទំនង​ជា​មិន​ប្រើ​អាវុធ​នុយក្លេអ៊ែរ ទេ

មន្ត្រីចារកម្មកំពូលរបស់អាមេរិក បាននិយាយកាលពីថ្ងៃព្រហស្បតិ៍ទី៤ខែឧសភាថា រុស្ស៊ីទំនងជាមិនប្រើប្រាស់អាវុធនុយក្លេអ៊ែររបស់ខ្លួនទេ ថ្វីបើវិមានក្រឹមឡាំងតែងតែគំរាម ហើយទីក្រុងមូស្គូ កំពុងរងគ្រោះធ្ងន់ធ្ងរក្នុងប្រតិបត្តិការនៅអ៊ុយក្រែនក៏ដោយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នាយកផ្នែកស៊ើបការណ៍សម្ងាត់ជាតិលោកស្រី Avril Haines បានប្រាប់គណៈកម្មាធិការប្រដាប់អាវុធព្រឹទ្ធសភាថា “តាមការវាយតម្លៃបច្ចុប្បន្នរបស់យើង វាមិនទំនងទេដែលរុស្ស៊ីនឹងប្រើអាវុធនុយក្លេអ៊ែរនោះ”។

ទោះបីជាយ៉ាងណាក៏ដោយ លោកស្រី Haines មិន​បាន​បញ្ជាក់​លម្អិត​អំពី​ការ​វាយ​តម្លៃរបស់​សហគមន៍​ស៊ើបការណ៍​សម្ងាត់សហរដ្ឋ​អាមេរិក​ឡើយ។

ភាពតានតឹងនុយក្លេអ៊ែររវាងរុស្ស៊ីនិងសហរដ្ឋអាមេរិក បានកើនឡើងខ្លាំងចាប់តាំងពីជម្លោះនៅអ៊ុយក្រែនផ្ទុះឡើង ដោយលោក ពូទីន បានព្រមានម្តងហើយម្តងទៀតថា រុស្ស៊ីត្រៀមខ្លួនរួចស្រេចអស់ហើយក្នុងការប្រើប្រាស់ឃ្លាំងអាវុធនុយក្លេអ៊ែររបស់ខ្លួន ប្រសិនបើចាំបាច់ដើម្បីការពារបូរណភាពទឹកដីរបស់ខ្លួន។

កាលពីខែកុម្ភៈ លោក ពូទីន បានប្រកាសថា រុស្ស៊ីផ្អាកការចូលរួមនៅក្នុងសន្ធិសញ្ញា New START ដែលជាកិច្ចព្រមព្រៀងអាវុធនុយក្លេអ៊ែរនៅសល់ចុងក្រោយតែមួយគត់ជាមួយសហរដ្ឋអាមេរិក។ វាគឺជាកិច្ចព្រមព្រៀងកំណត់ចំនួនក្បាលគ្រាប់យុទ្ធសាស្ត្រដែលភាគីនីមួយៗអាចដាក់ពង្រាយបាន៕

ប្រែសម្រួល៖ Vann Vann

ប្រភព៖ CNA

ចុចអាន៖ អាមេរិក បដិសេធ ជាមេខ្លោង នៃ ការ ប៉ុនប៉ងធ្វើឃាតលោក ពូទីន ក្នុងទីក្រុងមូស្គូ