ខ្មាន់កាំភ្លើង បាញ់ប្រហារនៅផ្សារទំនើបរដ្ឋតិចសាស់ សម្លាប់មនុស្សច្រើននាក់

ប៉ូលិសនិយាយថា ខ្មាន់កាំភ្លើងម្នាក់បានបាញ់សម្លាប់មនុស្សចំនួន៨នាក់ និងរបួសយ៉ាងតិច៧នាក់ទៀតនៅឯផ្សារទំនើបមួយកន្លែង ក្នុងរដ្ឋតិចសាស់។

ខ្មាន់កាំភ្លើងបានចេញពីរថយន្ត ហើយបើកការបាញ់ប្រហារនៅខាងក្រៅផ្សារទំនើប Allen Premium Outlets ក្នុងតំបន់ Allen ជាយក្រុង Dallas ជាហេតុបណ្តាលឲ្យអ្នកទិញអីវ៉ាន់រាប់រយនាក់ភ័យស្លន់ស្លោ រត់រកកន្លែងសុវត្ថិភាព។

សមត្ថកិច្ចបានឲ្យដឹងថា ខ្មាន់កាំភ្លើងគឺធ្វើសកម្មភាពតែម្នាក់ឯងប៉ុណ្ណោះ ហើយត្រូវបានសម្លាប់ដោយមន្ត្រីប៉ូលិសនៅកន្លែងកើតហេតុ។ ដូចនេះ បើសរុបទាំងខ្មាន់កាំភ្លើង នោះចំនួនមនុស្សស្លាប់ក្នុងហេតុការណ៍នេះ មានរហូតដល់ទៅ៩នាក់។

ទោះបីជាយ៉ាងណាក៏ដោយ ភ្លាមៗនេះ គេមិនដឹងច្បាស់អំពីមូលហេតុ ដែលនាំឲ្យខ្មាន់កាំភ្លើង បើកការវាយប្រហារនោះទេ។

ស្របពេលជាមួយគ្នានោះដែរ អភិបាលរដ្ឋតិចសាស់ លោក Greg Abbott បានហៅការបាញ់ប្រហារនេះថាជា “សោកនាដកម្មដែលរកពាក្យអ្វីមកថ្លែងមិនបាន”។ លោកនិយាយនៅក្នុងសេចក្តីថ្លែងការណ៍មួយថា រដ្ឋកំពុងរៀបចំដើម្បីផ្តល់ជំនួយណាមួយដែលអាជ្ញាធរមូលដ្ឋានត្រូវការ៕

ប្រែសម្រួល៖ Vann Vann

ប្រភព៖ SKY

ចុចអាន៖ ប៉ូលិសក្រុង Nashville បញ្ចេញវីដេអូ ខ្មាន់កាំភ្លើង ចូលបាញ់ប្រហារក្នុងសាលារៀន