ព័ត៌មានអន្ដរជាតិ

លោក ថាក់ស៊ីន និយាយដាក់លោក ប្រាយុទ្ធ យ៉ាងណាខ្លះ ក្រោយចាញ់ឆ្នោត?

បានផុស

៣ years មុន

នៅ

ថ្ងៃព្រហស្បតិ៍ ១៨ ឧសភា ២០២៣

ដោយ

អតីតនាយករដ្ឋមន្ត្រីដ៏មានឥទ្ធិពលរបស់ប្រទេសថៃគឺលោក ថាក់ស៊ីន ស៊ីណាវ៉ាត់ត្រា បាននិយាយកាលពីពេលថ្មីៗនេះថា មេទ័ពវ័យចំណាស់គឺលោក ប្រាយុទ្ធ ចាន់អូចា គួរតែចូលនិវត្តន៍ពីអាជីពនយោបាយដោយសេចក្ដីថ្លៃថ្នូរ ។

លោក ថាក់ស៊ីន បានលើកឡើងទៀតថា “មេទ័ពដែលបង្កឲ្យមានភាពចលាចលជាច្រើនឆ្នាំកន្លងមកនេះ គួរតែសម្រេចចិត្តចូលនិវត្តន៍ ហើយវាក៏ជាការដាស់តឿនដល់កងទ័ពផងដែរថា ការប្រើប្រាស់អំណាចហួសហេតុពេក គឺជាអ្វីដែលសង្គមថៃបដិសេធមិនបន្តគាំទ្រទៀតនោះទេ” ។

ទន្ទឹមនោះលោក ថាក់ស៊ីន ក៏បានសរសើរដល់គណបក្សចលនាឆ្ពោះទៅមុខផងដែរ ដែលឈ្នះការបោះឆ្នោតលើគណបក្សថៃរួបរួមជាតិរបស់លោក ប្រាយុទ្ធ ដោយសារតែយុទ្ធនាការឃោសនាតាមប្រព័ន្ធផ្សព្វផ្សាយសង្គមដូចជា TikTok ជាដើម ។

នៅក្នុងការបោះឆ្នោតសកលកាលពីថ្ងៃទី១៤ ខែឧសភាកន្លងទៅ គណបក្សថៃរួបរួមជាតិរបស់លោក ប្រាយុទ្ធ ឈរនៅលេខរៀងទី៥ ដោយទទួលបានត្រឹមតែ ៣៦ អាសនៈប៉ុណ្ណោះក្នុងសភាតំណាងរាស្រ្តចំនួន ៥០០ អាសនៈ ខណៈគណបក្សចលនាឆ្ពោះទៅមុខទទួលបានរហូតដល់ ១៥២ អាសនៈ ។

គួរបញ្ជាក់ថា លោក ថាក់ស៊ីន នៅតែជាឥស្សរជនដ៏លេចធ្លោមួយរូបក្នុងឆាកនយោបាយថៃ បើទោះជាត្រូវនិរទេសខ្លួនអស់រយៈពេល ១៧ ឆ្នាំ ដើម្បីគេចពីការកាត់ទោសដាក់ពន្ធនាគារ បន្ទាប់ពីលោកត្រូវបានទម្លាក់ពីអំណាចក្នុងរដ្ឋប្រហារឆ្នាំ ២០០៦ ក៏ដោយ ៕