អតីតមេដឹកនាំពិភពលោក អំពាវនាវដល់ G7 កុំអនុញ្ញាតឲ្យសន្ធិសញ្ញាអាវុធនុយក្លេអ៊ែរ ក្លាយជាជនរងគ្រោះរបស់មហាអំណាច

លិខិតមួយដែលចុះហត្ថលេខាដោយអតីតប្រមុខរដ្ឋ រដ្ឋមន្ត្រីខុទ្ទកាល័យ អ្នកការទូត និងអ្នកវិទ្យាសាស្ត្រជាង២៥០នាក់ បានជំរុញឲ្យក្រុមប្រទេស G7 កុំអនុញ្ញាតឲ្យកិច្ចចរចាគ្រប់គ្រងអាវុធនុយក្លេអ៊ែរ ក្លាយជាជនរងគ្រោះចំពោះការប្រឈមមុខដាក់គ្នានៃមហាអំណាចនាពេលបច្ចុប្បន្នឲ្យសោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លិខិតនេះមានហត្ថលេខាសរុបចំនួន២៥៦ មកពី៥០ប្រទេសផ្សេងៗគ្នា រួមទាំងអតីតប្រមុខរដ្ឋចំនួន៦នាក់, អតីតរដ្ឋមន្ត្រីការបរទេស និងការពារជាតិចំនួន២៦នាក់, អតីតឯកអគ្គរដ្ឋទូតចំនួន៣០នាក់ និងអ្នកវិទ្យាសាស្ត្រ អ្នកជំនាញ អ្នកធ្វើយុទ្ធនាការប្រឆាំងនុយក្លេអ៊ែរជាច្រើនទៀតផងដែរ។

លិខិតដែលរៀបចំរួមគ្នាដោយអង្គការមិនស្វែងរកប្រាក់ចំណេញចំនួនពីរ គឺបណ្តាញភាពជាអ្នកដឹកនាំអឺរ៉ុប និងបណ្តាញភាពជាអ្នកដឹកនាំអាស៊ីប៉ាស៊ីហ្វិក បាននិយាយថា “ពិភពលោក ត្រូវការការគ្រប់គ្រងអាវុធនុយក្លេអ៊ែរយ៉ាងចាំបាច់។ នៅក្នុងពេលវេលាដ៏ខ្មៅងងឹតបំផុតនៃសង្គ្រាមត្រជាក់, សហភាពសូវៀត និងសហរដ្ឋអាមេរិក មានឆន្ទៈក្នុងកិច្ចពិភាក្សា និងយល់ព្រមលើវិធានការកាត់បន្ថយហានិភ័យនៃសង្គ្រាមនុយក្លេអ៊ែរ។ សេចក្តីថ្លែងការណ៍នេះ សូមគាំទ្រការវិលត្រលប់ទៅរកវិធីការទូតនោះវិញ និងការពារការគ្រប់គ្រងអាវុធនុយក្លេអ៊ែរ ដែលជារឿងចាំបាច់ជាសកល”។

មុនកិច្ចប្រជុំកំពូល G7 នៅជប៉ុន, ប្រទេសហត្ថលេខី បានអំពាវនាវឲ្យមហាអំណាចនុយក្លេអ៊ែរចំនួន៥នៅក្រុមប្រឹក្សាសន្តិសុខអង្គការសហប្រជាជាតិមានដូចជា រុស្ស៊ី សហរដ្ឋអាមេរិក ចិន បារាំង និងចក្រភពអង់គ្លេស ត្រូវធានាថា ការគ្រប់គ្រងអាវុធនុយក្លេអ៊ែរ នឹងមិនត្រូវក្លាយជាជនរងគ្រោះនៃ ការប្រកួតប្រជែងភូមិសាស្ត្រនយោបាយឡើយ។

យោងតាមលិខិត, ការដួលរលំនៃ New START ដែលជាសន្ធិសញ្ញាគ្រប់គ្រងអាវុធនុយក្លេអ៊ែរនៅសេសសល់តែមួយគត់ រវាងសហរដ្ឋអាមេរិកនិងរុស្ស៊ី នឹងគំរាមកំហែងដល់ការប្រកួតប្រជែងសព្វាវុធ ហើយបង្កអស្ថិរភាពនិងធ្វើឲ្យកាន់តែលំបាក ក្នុងការនាំយកប្រទេសចិន បារាំង និងចក្រភពអង់គ្លេស ឲ្យចូលរួមក្នុងការរៀបចំពហុភាគី។

លិខិតដដែល បានអំពាវនាវឲ្យរុស្ស៊ីនិងសហរដ្ឋអាមេរិក ត្រូវបែងចែកឲ្យដាច់រវាងបញ្ហាជម្លោះរបស់ពួកគេនៅអ៊ុយក្រែន និងការបន្តកាតព្វកិច្ចពេញលេញរបស់ពួកគេក្រោមសន្ធិសញ្ញានេះ ហើយប្តេជ្ញាថានឹងមានការចរចាដោយស្មោះត្រង់ យកអ្វីមកជំនួស New START មុនពេលវាផុតកំណត់នៅឆ្នាំ២០២៦។

គួរបញ្ជាក់ជាថ្មី, ប្រទេសរុស្ស៊ីបានផ្អាកការចូលរួមរបស់ខ្លួននៅក្នុងសន្ធិសញ្ញា New START ក្នុងខែកុម្ភៈ ដោយលើកឡើងពីការវាយប្រហារដោយយន្តហោះគ្មានមនុស្សបើករបស់អ៊ុយក្រែន លើមូលដ្ឋានទ័ពអាកាសរបស់ខ្លួន និងការគាំទ្ររបស់សហរដ្ឋអាមេរិក ចំពោះអ៊ុយក្រែន ក្នុងគោលបំណងធ្វើឲ្យរុស្ស៊ីបរាជ័យ៕

ប្រែសម្រួល៖ Vann Vann

ប្រភព៖ RT

ចុចអាន៖ រុស្ស៊ី គំរាម G7 ជុំវិញបម្រាមនាំចេញទំនិញ