រុស្ស៊ី គំរាម G7 ជុំវិញបម្រាមនាំចេញទំនិញ

អតីតប្រធានាធិបតី និងបច្ចុប្បន្នជាអនុប្រធាននៃក្រុមប្រឹក្សាសន្តិសុខរុស្ស៊ីលោក Dmitry Medvedev បានសរសេរនៅក្នុងបណ្តាញ Telegram របស់គាត់កាលពីថ្ងៃអាទិត្យទី២៣ខែមេសាថា រុស្ស៊ីអាចនឹងចាកចេញពីកិច្ចព្រមព្រៀងគ្រាប់ធញ្ញជាតិអ៊ុយក្រែន ប្រសិនបើក្រុមប្រទេស G7 ដាក់បម្រាមទាំងស្រុងលើការនាំចេញទំនិញទៅកាន់ប្រទេសរុស្ស៊ី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមមន្ត្រីជាន់ខ្ពស់រូបនេះ, ទីក្រុងមូស្គូ ក៏អាចនឹងសងសឹក ដោយរឹតបន្តឹងការនាំចេញរបស់ខ្លួនទៅកាន់រដ្ឋលោកខាងលិចផងដែរ។

លោក Medvedev ​សរសេរថា “ល្អណាស់! G7 ចង់ហាមប្រាមទាំងស្រុងលើការនាំចេញទំនិញទៅកាន់ប្រទេសរបស់យើង។ ក្នុងនោះ វាក៏បង្កប់ន័យ នៃការបញ្ចប់ការនាំចេញប្រភេទទំនិញរសើបបំផុតសម្រាប់ G7 ផងដែរ។ ​ក្នុង​ករណី​នេះ កិច្ច​ព្រម​ព្រៀង​គ្រាប់​ធញ្ញជាតិ និង​អ្វី​ៗ​ជា​ច្រើន​ទៀត​ដែល​ពួក​គេ​ត្រូវ​ការ ក៏​នឹង​ត្រូវ​បញ្ចប់តាមនោះដែរ” ។

គួរបញ្ជាក់ថា កាលពីដើមសប្តាហ៍នេះ មានរបាយការណ៍ថា ក្រុមប្រទេស G7 ដូចជា ចក្រភពអង់គ្លេស អាល្លឺម៉ង់ អ៊ីតាលី កាណាដា សហរដ្ឋអាមេរិក បារាំង និងជប៉ុន កំពុងពិចារណាលើបម្រាមនាំចេញទំនិញភាគច្រើនទៅកាន់ប្រទេសរុស្ស៊ី ដោយលើកលែងតែប្រភេទសំខាន់ៗមួយចំនួនដូចជា ឱសថ អាហារ និងផលិតផលកសិកម្មប៉ុណ្ណោះ។

ហើយបច្ចុប្បន្ន ការនាំចេញពីរដ្ឋលោកខាងលិចទៅកាន់ប្រទេសរុស្ស៊ី ត្រូវបានអនុញ្ញាត ខណៈការរឹតបន្តឹងគឺអនុវត្តចំពោះតែទំនិញដែលកំណត់ដោយទណ្ឌកម្មប៉ុណ្ណោះ។

យោងតាមរបាយការណ៍, G7 គ្រោងនឹងដាក់បម្រាមនេះនៅក្នុងកិច្ចប្រជុំកំពូលបន្ទាប់របស់ពួកគេក្នុងប្រទេសជប៉ុន ដែលគ្រោងធ្វើនៅខែឧសភា ហើយ G7 នឹងបញ្ចុះបញ្ចូលសហភាពអឺរ៉ុប ឲ្យចូលរួមកាន់តែទូលំទូលាយក្នុងសកម្មភាពនេះ៕

ប្រែសម្រួល៖ Vann Vann

ប្រភព៖ RT

ចុចអាន៖ រដ្ឋ មន្ត្រី ការ បរទេស G7 ប្តេជ្ញា ជួយ ប្រជាជន អ៊ុយក្រែន ឲ្យ រស់រានមានជីវិត ក្នុង រដូវរងា