ព័ត៌មានអន្ដរជាតិ

ដំណើរការឈានទៅបង្កើតរដ្ឋាភិបាលចម្រុះ ថៃ កាន់តែពិបាក ក្រោយមានគណបក្សប្រកាសដកខ្លួន

បានផុស

៤ ខែ មុន

នៅ

ថ្ងៃអាទិត្យ ២១ ឧសភា ២០២៣

ដោយ

គណបក្សថ្មី (NP) ដែលបានឈ្នះតែ ១ អាសនៈសភា បានសម្រេចចិត្តដកខ្លួនចេញពីក្រុមចម្រុះដែលដឹកនាំដោយគណបក្សចលនាឆ្ពោះទៅមុខ (MFP) បន្ទាប់ពីគណបក្សនេះរងការវាយប្រហារយ៉ាងចាស់ដៃពីប្រព័ន្ធផ្សព្វផ្សាយសង្គម ជុំវិញគោលនយោបាយរបស់ខ្លួនស្ដីពីការរឹតបន្តឹងច្បាប់ប្រមាថព្រះមហាក្សត្រ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រធានគណបក្សថ្មី និងជាសមាជិកសភាជាប់ឆ្នោត លោក Kritditat Saengthanayothin បានពន្យល់ថា គណបក្សរបស់លោកមិនមានផែនការ ឬគោលនយោបាយក្នុងការធ្វើវិសោធនកម្មច្បាប់ប្រមាថព្រះមហាក្សត្រ ដើម្បីបង្កើនទោសប្រហារជីវិតចំពោះអ្នកប្រព្រឹត្តបទល្មើសនេះឡើយ ។

លោក Kritditat បញ្ជាក់ថា បន្ទាប់ពីមានការិះគន់ពីបណ្ដាញសង្គមរួចហើយ លោកមិនស្រណុកក្នុងខ្លួនឡើយ ហើយបានជូនដំណឹងដល់អនុប្រធានគណបក្សចលនាឆ្ពោះទៅមុខ ពីការសម្រេចចិត្តរបស់លោកក្នុងការដកខ្លួនចេញពីក្រុមចម្រុះមួយនេះ ។

គណបក្សថ្មីបានចេញសេចក្តីថ្លែងការណ៍កាលពីថ្ងៃសៅរ៍ថា គណបក្សមិនមានគោលការណ៍បង្កើនការពិន័យណាមួយ រួមទាំងការដាក់ទោសទណ្ឌចំពោះបទល្មើសប្រមាថព្រះមហាក្សត្រនោះទេ ហើយគោលនយោបាយចម្បងរបស់គណបក្សគឺការកម្ចាត់អំពើពុករលួយ ។

គួរបញ្ជាក់ថា រហូតមកដល់ពេលនេះ គណបក្សចលនាឆ្ពោះទៅមុខ ទើបតែប្រមូលបានគណបក្សចំនួន ៧ ដែលមានអាសនៈសរុប ៣១៣ ប៉ុណ្ណោះក្នុងបង្កើតរដ្ឋាភិបាលចម្រុះ ហើយដើម្បីអាចក្លាយជានាយករដ្ឋមន្ត្រីបាន, រដ្ឋាភិបាលចម្រុះត្រូវការសំឡេងភាគច្រើននៅក្នុងសភាជាន់ទាបចំនួន ៣៧៦ ៕