ហេតុអ្វី អាល្លឺម៉ង់ ចង់ឲ្យលោក ចូ បៃដិន ឈ្នះឆ្នោតលើ ដូណាល់ ត្រាំ?

អធិការបតីអាល្លឺម៉ង់ លោក Olaf Scholz បានបង្ហាញការគាំទ្ររបស់គាត់ចំពោះលោក ចូ បៃដិន នៅក្នុងការបោះឆ្នោតប្រធានាធិបតីអាមេរិកឆ្នាំក្រោយ ដោយនិយាយថា ប្រធានាធិបតីដែលកំពុងកាន់អំណាចរូបនេះ គឺស័ក្តិសមសម្រាប់ការងារកំពូល ដោយសារតែបទពិសោធន៍ដ៏ក្រាស់ក្រែលរបស់គាត់នៅក្នុងឆាកនយោបាយ។

អំឡុងពេលថ្លែងទៅកាន់សិស្សានុសិស្ស នៅសាលាបឋមសិក្សាមួយជិតទីក្រុងបែរឡាំង កាលពីថ្ងៃចន្ទទី២២ខែឧសភា​ លោក Scholz ត្រូវបានគេសួរថា រវាងលោក បៃដិន និងលោក ត្រាំ តើលោកចង់ឲ្យនរណាឈ្នះ។ គាត់ឆ្លើយថា ប្រធានាធិបតីបច្ចុប្បន្នគឺប្រសើរជាង ហើយគាត់សង្ឃឹមថា លោក បៃដិន​ នឹងជាប់ឆ្នោតអាណត្តិទី២ ដោយលើកហេតុផលថា អ្នកប្រជាធិបតេយ្យដែលមានអាយុ៨០ឆ្នាំរូបនេះ ដឹងថាត្រូវធ្វើអ្វី ដើម្បីការពារពិភពលោកមិនឲ្យកើតសង្រ្គាម។

ទាក់ទងនឹងលោក ត្រាំ, លោកអធិការបតីបាននិយាយថា អតីតប្រធានាធិបតីរូបនេះ បង្កឲ្យមានការបែកបាក់គ្នានៅក្នុងប្រទេស ហើយសហរដ្ឋអាមេរិក នឹងគ្មានអនាគតល្អឡើយ ប្រសិនបើគាត់ឈ្នះនៅឆ្នាំ២០២៤។

យោងតាមការស្ទង់មតិរបស់ Morning Consult ដែលចេញផ្សាយកាលពីសប្តាហ៍មុន បានបង្ហាញថា លោក ត្រាំ គឺនាំមុខដាច់ លើគូប្រជែងទាំងអស់នៅក្នុងការបោះឆ្នោតបឋមរបស់គណបក្សសាធារណរដ្ឋ រួមទាំងអភិបាលរដ្ឋ Florida លោក Ron DeSantis ផងដែរ។

ការស្ទង់មតិមួយទៀតដោយ Big Data បង្ហាញថា ប្រសិនបើការបោះឆ្នោតសកល ត្រូវបានធ្វើឡើងក្នុងខែឧសភានេះ លោក បៃដិន នឹងចាញ់លោក ត្រាំ ដោយអ្នកសាធារណរដ្ឋ ទទួលបានសំឡេង ៤៥% ខណៈអ្នកប្រជាធិបតេយ្យទទួលបាន ត្រឹម ៣៨,១%ប៉ុណ្ណោះ៕

ប្រែសម្រួល៖ Vann Vann

ប្រភព៖ RT

ចុចអាន៖ លោកស្រី Clinton ព្រមានថា បើ Trump ជាប់ឆ្នោត អ៊ុយក្រែន នឹងចប់