ខួបកំណើតអាយុ ១០០ ឆ្នាំរបស់អ្នកការទូត អាមេរិក ដែលនៅពី​ក្រោយការទម្លាក់គ្រាប់បែកលើ កម្ពុជា

លោក Henry Kissinger ដែលជាអ្នកដឹកនាំនយោបាយការបរទេសដ៏លេចធ្លោ និងបានផ្ដល់ប្រឹក្សាដល់ប្រធានាធិបតីសហរដ្ឋអាមេរិកជាច្រើនរូបមកនោះ បានឈានចូលដល់វ័យ ១០០ ឆ្នាំហើយនៅថ្ងៃសៅរ៍ ទី២៧ ខែឧសភានេះ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អតីតរដ្ឋមន្ត្រីការបរទេសសហរដ្ឋអាមេរិករូបនេះត្រូវបានគេចាត់ទុកជាអ្នកយុទ្ធសាស្ត្រខាងភូមិសាស្ត្រនយោបាយដ៏ខ្លាំងក្លាមួយរូប ហើយក៏ត្រូវបានចាត់ទុកថាជាឧក្រិដ្ឋជនសង្គ្រាមផងដែរ ជាពិសេសលោក Kissinger គឺជាអ្នកនៅពីក្រោយនៃព្រឹត្តិការណ៍ទម្លាក់គ្រាប់បែករបស់សហរដ្ឋអាមេរិកមកលើកម្ពុជា អំឡុងឆ្នាំ ១៩៦៩ ដល់ឆ្នាំ ១៩៧៣ ។

អំឡុងពេលនោះ លោក Kissinger តែងតែទទួលបានសំឡេងគាំទ្រជានិច្ចលើគោលនយោបាយការបរទេសរបស់សហរដ្ឋអាមេរិក ក្រោមការដឹកនាំរបស់លោកប្រធានាធិបតី Richard Nixon និងលោក Gerald Ford ក្នុងទសវត្សរ៍ឆ្នាំ ១៩៧០ ។

មែនទែនទៅ ដំបូងឡើយលោក Kissinger មានឈ្មោះ Heinz Alfred Kissinger កើតនៅទីក្រុង Furth ប្រទេសអាឡឺម៉ង់ក្នុងឆ្នាំ ១៩២៣ ប៉ុន្តែក្រោយមកបានផ្លាស់ទៅរស់នៅសហរដ្ឋអាមេរិកជាមួយក្រុមគ្រួសារនៅឆ្នាំ ១៩៣៨ មុនពេលយុទ្ធនាការរបស់ពួកណាស៊ីដើម្បីសម្លាប់ជនជាតិយូដានៅអឺរ៉ុប ។

បន្ទាប់មកអ្នកការទូតរូបនេះបានដាក់ឈ្មោះខ្លួនឯងថា Henry Kissinger ហើយបានក្លាយជាពលរដ្ឋអាមេរិកស្របច្បាប់នៅឆ្នាំ ១៩៤៣ និងបានបម្រើការក្នុងជួរកងទ័ពនៅអឺរ៉ុប ក្នុងសង្គ្រាមលោកលើកទី ២ ។ ក្រោយមកទៀត លោកបានជាប់អាហារូបករណ៍ចូលសិក្សានៅសាកលវិទ្យាល័យ Harvard ហើយទទួលបានសញ្ញាប័ត្រអនុបណ្ឌិតនៅឆ្នាំ ១៩៥២ និងបណ្ឌិតនៅឆ្នាំ ១៩៥៤ ។

ក្រោយចូលខ្លួនប្រឡូកក្នុងឆាកនយោបាយនាទសវត្សរ៍ឆ្នាំ ១៩៧០ លោក Kissinger បានលូកដៃចូលទៅក្នុងព្រឹត្តិការណ៍ពិភពលោកជាច្រើន អំឡុងពេលដែលលោកបម្រើការជារដ្ឋលេខាធិការក្រោមការដឹកនាំរបស់លោក Nixon និងលោក Ford ជាពិសេសក្នុងកិច្ចខិតខំប្រឹងប្រែងរបស់ជនភៀសខ្លួនជ្វីហ្វដើមកំណើតអាល្លឺម៉ង់ បាននាំទៅដល់ការបើកការទូតរបស់ប្រទេសចិន, កិច្ចចរចាគ្រប់គ្រងអាវុធអាមេរិក-សូវៀត, ពង្រីកទំនាក់ទំនងរវាងអ៊ីស្រាអែល និងប្រទេសជិតខាងអារ៉ាប់ ក៏ដូចជាកិច្ចព្រមព្រៀងសន្តិភាពទីក្រុងប៉ារីសជាមួយវៀតណាមខាងជើងជាដើម ។

ប៉ុន្តែរជ្ជកាលរបស់លោក Kissinger ជាស្ថាបត្យករដ៏សំខាន់នៃគោលនយោបាយការបរទេសរបស់សហរដ្ឋអាមេរិកបានដាំក្បាលចុះក្រោម ជាមួយនឹងការលាលែងពីតំណែងរបស់ Richard Nixon ក្នុងឆ្នាំ ១៩៧៤ ប៉ុន្តែបុរសវ័យ ១០០ ឆ្នាំរូបនេះនៅតែជាកម្លាំងការទូតដែលមិនអាចខ្វះបាន ក្រោមការដឹកនាំរបស់លោកប្រធានាធិបតី Gerald Ford ។

គួរបញ្ជាក់ថា លោក Kissinger ធ្លាប់ទទួលបានពានរង្វាន់ណូបែលសន្តិភាពនៅឆ្នាំ ១៩៧៣ ដោយសារតែសកម្មភាពរបស់លោកក្នុងការចរចាបទឈប់បាញ់នៅក្នុងប្រទេសវៀតណាម ក្រោមកាលៈទេសៈដ៏ចម្រូងចម្រាស ៕

ប្រែសម្រួលដោយ ៖ ជីវ័ន្ត

ប្រភព ៖ The Nation Thailand