១៨ មីនា ឆ្នាំ១៩៦៩ លោក Kissinger ចាប់ផ្ដើមរៀបចំផែនការប្រើយន្តហោះ B-52 ទម្លាក់គ្រាប់បែកនៅ កម្ពុជា

លោក Henry Kissinger និងជំនួយការរបស់លោកគឺលោក Alexander Haig បានចាប់ផ្តើមរៀបចំផែនការទម្លាក់គ្រាប់បែកសម្ងាត់នៅកម្ពុជា ដែលសុទ្ធសឹងតែប្រើយន្តហោះទម្លាក់គ្រាប់បែក B-52 ពីថ្ងៃទី១៨ ខែមីនា ឆ្នាំ១៩៦៩ ដល់ថ្ងៃទី២៦ ខែឧសភា ឆ្នាំ១៩៧០ ។

ផែនការរៀបចំការទម្លាក់គ្រាប់បែកជាកម្រាលព្រំរបស់បុរសវ័យ ១០០ ឆ្នាំរូបនេះ​ត្រូវ​បាន​រក្សា​ទុក​ជា​សម្ងាត់​ ហើយក្រោយមកលោក Kissinger បានអនុវត្តលើផែនការនីមួយៗ និងតាមលំដាប់លំដោយក្នុងចំណោមផែនការទម្លាក់គ្រាប់បែកសរុបចំនួន ៣,៨៧៥ លើកមកលើទឹកដីនៃប្រទេសកម្ពុជា ក្រោមលេសដេញទ័ពវៀតណាមខាងជើង និងទ័ពព្រៃវៀតណាមខាងត្បូង ។

យោងតាមវិទ្យុហាណូយរបស់វៀតណាមខាងជើង និងបញ្ជាក់ដោយកាសែត New York Times ក្នុងខែឧសភា ឆ្នាំ១៩៦៩ បានឲ្យដឹងថា ការទម្លាក់គ្រាប់បែកសម្ងាត់មកលើកម្ពុជានៅពេលនោះ ត្រូវបានសាធារណជន និងគណៈកម្មាធិការសភាពាក់ព័ន្ធរបស់អាមេរិក មិនទទួលខុសត្រូវ និងបដិសេធជាផ្លូវការ ។

ទន្ទឹមនោះ សភា និងប្រជាជនអាមេរិកគឺមិនដឹងអ្វីទាំងអស់ ជាពិសេសនៅថ្ងៃទី៣០ ខែមេសា ឆ្នាំ១៩៧០ នៅពេលដែលលោក Kissinger បានប្រកាសជាសាធារណៈលើកដំបូងពីការចូលលុកលុយរបស់អាមេរិកលើទឹកដីនៃប្រទេស​កម្ពុជា ដើម្បី​វាយ​ប្រហារ​តំបន់​មូលដ្ឋាន​ទ័ព​សត្រូវ ។

ប៉ុន្តែទោះជាយ៉ាងណា លោក Richard Nixon ដែលជាប្រធានាធិបតីនៅពេលនោះ បាននិយាយកុហកប្រាប់ប្រជាពលរដ្ឋនៅក្នុងប្រទេសថា “រយៈពេល ៥ ឆ្នាំមកនេះទាំងសហរដ្ឋអាមេរិក និងវៀតណាមខាងត្បូងមិនបានធ្វើចលនាប្រឆាំងនឹងទីតាំងរបស់សត្រូវទាំងនេះទេ ពីព្រោះយើងមិនមានបំណងចង់រំលោភលើទឹកដីនៃប្រទេសអព្យាក្រឹតណាមួយឡើយ” ។

គួរបញ្ជាក់ថា ចាប់តាំងពីឆ្នាំ ១៩៦៥ ដល់ឆ្នាំ ១៩៧៣ សហរដ្ឋអាមេរិកបានទម្លាក់គ្រាប់បែកមកលើទឹកដីនៃប្រទេសកម្ពុជាជាង ២៣១,០០០ លើក ហើយចន្លោះឆ្នាំ ១៩៦៩ និងឆ្នាំ ១៩៧៣ ពោលអំឡុងពេលដែលលោក Kissinger ជាទីប្រឹក្សាសន្តិសុខជាតិ យន្តហោះរបស់សហរដ្ឋអាមេរិកបានទម្លាក់គ្រាប់បែកសរុប ៥០ ម៉ឺនតោន ឬច្រើនជាងនេះ ៕

ប្រែសម្រួលដោយ ៖ ជីវ័ន្ត

ប្រភព ៖ Madras Tribune

ចុចអាន ៖ លោក Kissinger ថា ដោយសារ វៀតណាម ទើប អាមេរិក ទម្លាក់គ្រាប់បែក​មកលើ កម្ពុជា