ដឹងមូលហេតុ ដែលបណ្តាលឲ្យរថភ្លើងបុកគ្នា ស្លាប់មនុស្សជិត ៣០០នាក់ នៅ ឥណ្ឌា

កាលពីថ្ងៃអាទិត្យទី៤ខែមិថុនា រដ្ឋមន្ត្រីផ្លូវដែកក្នុងប្រទេសឥណ្ឌា បានបញ្ជាក់ច្បាស់ៗអំពីមូលហេតុ នៃឧបទ្ទវហេតុរថភ្លើង ដែលឆក់យកជីវិតមនុស្សជិត៣០០នាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សោកនាដកម្មផ្លូវដែក ដែលជារឿងដ៏អាក្រក់បំផុតរបស់ឥណ្ឌាក្នុងរយៈពេលប៉ុន្មានទសវត្សរ៍មកនេះ បានកើតឡើងកាលពីល្ងាចថ្ងៃសុក្រទី២ខែមិថុនា នៅស្ថានីយ៍មួយក្នុងរដ្ឋ Odisha ភាគខាងកើត នៅពេលរថភ្លើងដឹកអ្នកដំណើរល្បឿនលឿន Coromandel Express បានបុកជាមួយរថភ្លើងដឹកទំនិញដែលផ្ទុកដោយរ៉ែដែក។

ហេតុការណ៍បុកគ្នា​នេះ ​បណ្តាលឲ្យទូ​រថភ្លើង​មួយ​ចំនួន​ ធ្លាក់ទៅលើ​ផ្លូវ​ផ្ទុយ​គ្នា ហើយប៉ុន្មាននាទីក្រោយមក រថភ្លើងដឹកអ្នកដំណើរទីពីរ បានមកបុកទូរថភ្លើងទាំងនោះ។

ថ្លែងទៅកាន់ទីភ្នាក់ងារព័ត៌មាន ANI លោក Vaishnaw បាននិយាយថា ឧបទ្ទវហេតុនេះបានកើតឡើងដោយសារតែកំហុសនៃការផ្លាស់ប្តូរប្រព័ន្ធគ្រប់គ្រងចលនារថភ្លើង។

ទន្ទឹមនឹងនេះ លោក Jaya Verma Sinha មន្ត្រីផ្លូវដែកជាន់ខ្ពស់ បានអះអាងថា ទិន្នន័យបឋមបង្ហាញថា រថភ្លើង Coromandel Express បានទទួលសញ្ញាដើម្បីប្រើប្រាស់ផ្លូវដែក ប៉ុន្តែក្រោយមកវាបានផ្លាស់ប្តូរវិញ។ ហេតុនេះបណ្តាលឲ្យ​រថភ្លើង ​ចូលខុសគន្លងនៅ​ជាប់​គ្នា ហើយបណ្តាលឲ្យ​បុកជាមួយរថភ្លើង​ដឹកទំនិញតែម្តង។

លើសពីនេះ​ លោក Vaishnaw និយាយថា អាជ្ញាធរបានកំណត់អត្តសញ្ញាណមនុស្សជាច្រើននាក់ ដែលទទួលខុសត្រូវចំពោះឧបទ្ទវហេតុនេះ ប៉ុន្តែមិនផ្តល់ព័ត៌មានលម្អិតបន្ថែមទៀត ដោយលើកហេតុផលថា ការស៊ើបអង្កេតកំពុងបន្ត។

ថ្វីបើដំបូង តួលេខមនុស្សស្លាប់ត្រូវបានគេប៉ាន់ស្មានថាមានចំនួន២៨៨នាក់ និងអ្នករបួសជាង ១០០០នាក់ក៏ដោយ ប៉ុន្តែក្រោយមកប្រធានរដ្ឋ Odisha លោក Pradeep Jena បានកែប្រែតួលេខ ចុះមកនៅត្រឹម២៧៥នាក់វិញ ដោយអះអាងថា អាជ្ញាធរច្រឡំរាប់សាកសពខ្លះដល់ទៅពីរដង។

លោក​ក៏​បាន​កត់​សម្គាល់​ផង​ដែរ​ថា សាកសព​ចំនួន ៨៨ នាក់ ត្រូវ​បាន​កំណត់​អត្តសញ្ញាណ៕

ប្រែសម្រួល៖ Vann Vann

ប្រភព៖ RT

ចុចអាន៖ រថភ្លើងបុកគ្នានៅឥណ្ឌា ក្លាយជាគ្រោះមហន្តរាយផ្លូវដែក សម្លាប់មនុស្សច្រើនបំផុតក្នុងរយៈពេល ២៥ឆ្នាំចុងក្រោយ