ចិន ថា ប្រទេសអាស៊ីភាគច្រើនប្រឆាំងការពង្រីកអង្គការ ណាតូ នៅក្នុងតំបន់

អ្នកនាំពាក្យក្រសួងការបរទេសចិន លោក Wang Wenbin បាននិយាយនៅក្នុងសន្និសីទសារព័ត៌មានមួយកាលពីថ្ងៃចន្ទថា ប្រទេសភាគច្រើននៃតំបន់អាស៊ីប៉ាស៊ីហ្វិក ប្រឆាំងនឹងការប្រឈមមុខដាក់គ្នា ជាពិសេសគឺការពង្រីកខ្លួនរបស់អង្គការណាតូនៅក្នុងតំបន់នេះ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកនាំពាក្យរូបនេះបានលើកឡើងថា “ជំហររបស់ប្រទេសភាគច្រើននៅក្នុងតំបន់គឺច្បាស់ណាស់ប្រឆាំងនឹងការបញ្ចូលគ្នានៃប្លុកយោធាផ្សេងៗនៅក្នុងតំបន់ ។ ពួកគេមិនស្វាគមន៍ការពង្រីករបស់ណាតូទៅក្នុងតំបន់អាស៊ីនោះទេ ហើយពួកគេក៏មិនទទួលយកការបង្កើតឲ្យមានការប្រឈមមុខដាក់គ្នារបស់ប្លុកនេះមកកាន់អាស៊ីផងដែរ“ ។

លោក Wang Wenbin បានចង្អុលបង្ហាញទៀតថា “រដ្ឋក្នុងតំបន់នឹងមិនអនុញ្ញាតឲ្យមានសង្គ្រាមត្រជាក់ ឬសង្រ្គាមក្តៅនៅអាស៊ីឡើយ ។ ក្នុងនោះប្រទេសឥណ្ឌូណេស៊ី សិង្ហបុរី និងប្រទេសមួយចំនួនទៀតមិនចង់បង្ខំឲ្យជ្រើសរើសរវាងចិន និងអាមេរិកនោះទេ ។

លោក​បាន​បន្ថែម​ថា អាស៊ី​គឺ​ជាតំបន់​ដែល​មាន​សក្ដានុពល​ខ្លាំង​បំផុត​សម្រាប់​កំណើន និង​ការ​អភិវឌ្ឍ​ក្នុង​ពិភពលោក ហើយអាស៊ីគួរតែជាសង្វៀនដ៏ធំមួយសម្រាប់កិច្ចសហប្រតិបត្តិការដែលមានផលប្រយោជន៍ទៅវិញទៅមក ហើយមិនគួរយកតំបន់នេះបែងចែកទៅជាប្លុកតូចតាច ឬធ្វើជាកម្មសិទ្ធិផ្តាច់មុខនោះទេ ។

លោក Wang Wenbin សង្កត់ធ្ងន់ថា “ប្រទេសមួយចំនួនបង្ហាញពីការមានសេរីភាព និងបើកចំហរដើម្បីរក្សាសន្តិភាព និងវិបុលភាពនៅក្នុងតំបន់ ប៉ុន្តែតាមពិតពួកគេកំពុងខ្វែងគំនិតគ្នាឥតឈប់ឈរនៅក្នុងប្លុកយោធាផ្សេងៗ ហើយព្យាយាមជំរុញណាតូចូលទៅក្នុងតំបន់អាស៊ីប៉ាស៊ីហ្វិក” ។

គួរបញ្ជាក់ថា តំណាងមកពីប្រទេសឥណ្ឌូណេស៊ី សិង្ហបុរី និងប្រទេសមួយចំនួនទៀតបានសម្តែងការមិនពេញចិត្តចំពោះសង្រ្គាមត្រជាក់ថ្មីនៅក្នុងសន្និសិទសន្តិសុខអន្តរជាតិ Shangri-La Dialogue ដែលធ្វើឡើងនៅថ្ងៃទី២ ដល់ថ្ងៃទី៤ ខែមិថុនានៅប្រទេសសិង្ហបុរី ។

នៅទីនោះ រដ្ឋមន្ត្រីការពារជាតិចិន លោក Li Shangfu បានបង្ហាញគំនិតផ្តួចផ្តើមសន្តិសុខថ្មីរបស់ចិន ហើយនៅក្នុងសុន្ទរកថារបស់លោកនៅឯវេទិកានោះ លោកបានកត់សម្គាល់ថា ការបង្កើតសម្ព័ន្ធភាពយោធាដូចណាតូនៅក្នុងតំបន់អាស៊ីប៉ាស៊ីហ្វិក នឹងនាំឲ្យមានជម្លោះជាបន្តបន្ទាប់ ៕

ប្រែសម្រួលដោយ ៖ ជីវ័ន្ត

ប្រភព ៖ TASS

ចុចអាន ៖ ណាតូ ត្រៀមពង្រីកទីស្នាក់ការ ដើម្បីទុកកន្លែងឲ្យសមាជិកថ្មី