លោក ប្រាយុទ្ធ​ ទទួលស្គាល់ថា ខ្លួននៅសល់ឱកាសតិចតួចបំផុត ក្នុងការកាន់អំណាចមួយអាណត្តិទៀត

នាយករដ្ឋមន្ត្រីថៃលោក ប្រាយុទ្ធ ចាន់អូចា បានបញ្ជាក់កាលពីថ្ងៃអង្គារ ទី៦ ខែមិថុនាថា លោកមើលឃើញឱកាសតិចតួចណាស់ សម្រាប់លោកក្នុងការវិលត្រលប់ទៅកាន់អំណាចមួយអាណត្តិទៀត ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ប្រាយុទ្ធ បានលើកឡើងបែបនេះ ជាការឆ្លើយតបទៅនឹងសំណួររបស់អ្នកសារព័ត៌មានអំពីផែនការនយោបាយរបស់លោក ខណៈប្លុកដែលដឹកនាំដោយគណបក្ស ចលនាឆ្ពោះទៅមុខ កំពុងធ្វើការដើម្បីបង្កើតរដ្ឋាភិបាលចម្រុះថ្មីមួយ។

លោកហាក់ដូចជាស្រឡាំងកាំង នៅពេលអ្នកសារព័ត៌មាន សួរអំពីលទ្ធភាពដែលថា គណបក្សតូចៗអាចតែងតាំងលោកជានាយករដ្ឋមន្ត្រី ប្រសិនបើគណបក្សចលនាឆ្ពោះទៅមុខ ឬ ភឿថៃ មិនអាចសហការគ្នាបង្កើតរដ្ឋាភិបាលចម្រុះថ្មីបាន។

លោកប្រាយុទ្ធ និយាយថា “កុំគិតវែងឆ្ងាយ! លោកកំពុង​ផ្តោត​អារម្មណ៍​​លើ​ការ​ធ្វើ​ការ ​ជា​ផ្នែក​មួយ​នៃ​រដ្ឋាភិបាល​ចាំផ្ទះ”។ ទន្ទឹមនោះ លោកបន្ត​ថា លោក​មិន​ខ្លាច​ការ​ស៊ើបអង្កេត ​ក្រោយ​ការ​ផ្លាស់​ប្តូរ​អំណាច​នោះ​ទេ។

គួរបញ្ជាក់ជាថ្មី គណបក្សចលនាឆ្ពោះទៅមុខ បានឈ្នះការបោះឆ្នោតនៅថ្ងៃទី១៤ ខែឧសភាជាមួយអាសនៈ ១៥១ ខណៈបច្ចុប្បន្នសម្ព័ន្ធដែលដឹកនាំដោយបក្សមួយនេះ មានការគាំទ្រពីសមាជិកសភាចំនួន ៣១២ រូប រួមទាំងសមាជិកមកពីបក្សភឿថៃ និងក្រុមចម្រុះចំនួន ៦ ផ្សេងទៀតផងដែរ ប៉ុន្តែចំនួននេះមិនទាន់គ្រប់គ្រាន់នៅឡើយទេ សម្រាប់តំណែងនាយករដ្ឋមន្ត្រី ពោលគឺក្រុមចម្រុះត្រូវការសំឡេងចំនួន ៣៧៦៕

ប្រែសម្រួល៖ Vann Vann

ប្រភព៖ Bangkok Post

ចុចអាន៖ ដឹងទេ ក្រោយបោះឆ្នោតប៉ុន្មានថ្ងៃទើប ថៃ ប្រកាសលទ្ធផលផ្លូវការ