មនុស្សរាប់ម៉ឺននាក់ត្រូវជម្លៀស បន្ទាប់ពីបាក់ទំនប់វារីអគ្គិសនីនៅ Kherson

មនុស្សរាប់ម៉ឺននាក់ កំពុងត្រូវបានជម្លៀសចេញនៅខ្សែទឹកខាងក្រោម បន្ទាប់ពីទំនប់វារីអគ្គិសនីដ៏ធំមួយ បានបាក់នៅក្នុងទឹកដីដែលកាន់កាប់ដោយរុស្ស៊ី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រធានាធិបតីអ៊ុយក្រែនលោក វ្ល៉ាឌីមៀរ ហ្សេលេនស្គី បាននិយាយថា ទីក្រុង និងភូមិចំនួន ៨០ ត្រូវប្រឈមនឹងហានិភ័យនៃគ្រោះទឹកជំនន់ បន្ទាប់ពីការបំផ្លាញទំនប់ Nova Kakhovka ដែលលោកបានដាក់ការស្តីបន្ទោសលើប្រទេសរុស្ស៊ី។

នៅតាមដងទន្លេ Dnipro, ទឹកកំពុងហក់ឡើង ជាហេតុបង្កហានិភ័យគ្រោះទឹកជំនន់ដ៏មហន្តរាយដល់ទីក្រុង Kherson។

ទោះបីជាយ៉ាងណាក៏ដោយ រុស្ស៊ី​បាន​បដិសេធ​ការ​បំផ្លាញ​ទំនប់​វារីអគ្គិសនីនោះ ហើយបែរជាស្តី​បន្ទោស​ការ​បាញ់​ផ្លោង​របស់​អ៊ុយក្រែន វិញ ។

អគ្គរដ្ឋអាជ្ញារងអ៊ុយក្រែន Viktoriya Lytvynova បានប្រាប់អ្នកសារព័ត៌មានថា មនុស្សប្រហែល ៤ ម៉ឺននាក់ ត្រូវការជម្លៀសចេញ។ ក្នុងនោះមានមនុស្ស ១,៧០០០ នាក់នៅក្នុងទឹកដីដែលគ្រប់គ្រងដោយអ៊ុយក្រែននៅភាគខាងលិចនៃទន្លេ Dnipro និង ២,៥០០០ នាក់នៅភាគខាងកើតដែលគ្រប់គ្រងដោយរុស្ស៊ី។

ចំណែករដ្ឋមន្ត្រីក្រសួងមហាផ្ទៃអ៊ុយក្រែនលោក Ihor Klymenko បាននិយាយថា តំបន់ចំនួន ២៤ ត្រូវបានទឹកជន់លិច។

គួរបញ្ជាក់ថា ទំនប់ Kakhovka គឺមានសារសំខាន់ខ្លាំងណាស់នៅក្នុងតំបន់ ហើយវាមានអាងស្តុក ដែលផ្តល់ទឹកដល់កសិករ និងអ្នកស្រុក ក៏ដូចជាដល់រោងចក្រថាមពលនុយក្លេអ៊ែរ Zaporizhzhia ផងដែរ។ លើសពីនេះ វា​ក៏​ជា​ច្រក​ដ៏​សំខាន់​មួយ ​ដែលផ្គត់ផ្គង់​ទឹក​ពី​ភាគ​ខាង​ត្បូង​ទៅ​កាន់​តំបន់​គ្រីមៀទៀតផង៕

ប្រែសម្រួល៖ Vann Vann

ប្រភព៖ BBC

ចុចអាន៖ អ៊ុយក្រែន ចោទរុស្ស៊ី បំផ្ទុះទំនប់វារីអគ្គិសនីនៅតំបន់ Kherson បង្កហានិភ័យ គ្រោះទឹកជំនន់ ធ្ងន់ធ្ងរ