ប្រទេសមួយនៅ អឺរ៉ុប ហាមមិនឲ្យអ្នកទេសចររួមភេទលើឆ្នេរខ្សាច់

ទីក្រុងឆ្នេរមួយនៅភាគខាងត្បូងប្រទេសហូឡង់​ បានដាក់ចេញយុទ្ធនាការបញ្ឈប់ភ្ញៀវទេសចរដែលទៅដេកលេងអាក្រាតកាយនៅលើឆ្នេរសមុទ្រ មិនឲ្យធ្វើសកម្មភាពផ្លូវភេទផ្តេសផ្តាសនៅកណ្តាលវាលឡើយ បន្ទាប់ពីមានការត្អូញត្អែរពីប្រជាពលរដ្ឋនៅតំបន់នោះ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អាជ្ញាធរនៅទីក្រុង Veere ភាគខាងត្បូងប្រទេសហូឡង់បានឲ្យដឹងថា យុទ្ធនាការហាមប្រាមនេះធ្វើឡើង បន្ទាប់ពីមានភ្ញៀវទេសចរមួយចំនួនទៅកម្សាន្តដេកលេងអាក្រាតកាយ​ ហើយប្រជុំគ្នានៅលើ​ឆ្នេរខ្សាច់ធ្វើសកម្មភាពស្រើបស្រាលដោយមិនក្រែងចិត្តភ្ញៀវទេសចរដទៃ ។

ទន្ទឹមនោះអភិបាលក្រុងលោកស្រី Frederiek Schouwenaar បានប្រាប់សារព័ត៌មាន The Observer ថា “វាលខ្សាច់មានសារៈសំខាន់ខ្លាំងណាស់សម្រាប់សហគមន៍មូលដ្ឋាន ហើយវាគួរតែត្រូវបានការពារ ជាពិសេសមិនត្រូវមានសកម្មភាពផ្លូវភេទណាមួយកើតឡើងនៅទីនេះឡើយ” ។

ដោយឡែកសម្រាប់ពលរដ្ឋនៅតំបន់នោះក៏ប្រាប់ដែរថា សកម្មភាពបែបនេះបានកើតឡើងអស់រយៈពេលជាច្រើនឆ្នាំមកហើយ ដោយមើលទៅ ពិបាកភ្នែកមែនទែន ហើយជាការឆ្លើយតប អភិបាលក្រុង​បានសម្រេចចិត្តលើកស្លាកព្រមាន និងហាមឃាត់មិនឲ្យមានរឿងដដែលៗនេះនៅលើឆ្នេរសមុទ្រទៀតឡើយ ​ដើម្បី​ធានា​សណ្តាប់ធ្នាប់ និង​សុវត្ថិភាព​សាធារណៈ ៕

ប្រែសម្រួល ៖ នាង រតនៈ

ប្រភព ៖ RT