អាមេរិក សម្រេចលក់អាវុធឲ្យ តៃវ៉ាន់ ក្នុងទំហំទឹកប្រាក់ ៤៤០ លានដុល្លារ

រដ្ឋាភិបាលសហរដ្ឋអាមេរិកបានអនុម័តការលក់អាវុធក្នុងទំហំទឹកប្រាក់ប្រហែល ៤៤០ លានដុល្លារទៅឲ្យកោះតៃវ៉ាន់ ដែលកំពុងប្រឈមនឹងការកើនឡើងសម្ពាធយោធាពីប្រទេសចិន ។

រដ្ឋាភិបាលសហរដ្ឋអាមេរិកកាលពីថ្ងៃសុក្របានជូនដំណឹងដល់សភារួចរាល់អស់ហើយ អំពីការសម្រេចចិត្តលក់គ្រាប់រំសេវ ៣០ មីលីម៉ែត្រសម្រាប់រថពាសដែក ព្រមទាំងគ្រឿងបន្លាស់សម្រាប់យានយោធា ក៏ដូចជារបស់របរផ្សេងៗទៀតទៅកាន់កោះតៃវ៉ាន់ ។

ពាក់ព័ន្ធនឹងបញ្ហានេះដែរ មន្ត្រីរដ្ឋាភិបាលសហរដ្ឋអាមេរិក បាននិយាយថា ការលក់គ្រាប់រំសេវនេះ នឹងជួយទ្រទ្រង់រថពាសដែក CM-34 ដែលផលិតនៅតៃវ៉ាន់តែម្ដង ដើម្បីបង្កើនសមត្ថភាពរបស់កោះនេះ ក្នុងការទប់ទល់នឹងការគំរាមកំហែងនាពេលបច្ចុប្បន្ន និងពេលអនាគត ជាពិសេសពីសំណាក់ប្រទេសចិន ។

ទន្ទឹមនោះ ក្រសួងការពារជាតិតៃវ៉ាន់បានលើកឡើងដែរថា ការទទួលបានគ្រាប់រំសេវពីសហរដ្ឋអាមេរិក គឺចាំបាច់សម្រាប់ការស្តុកទុកបន្ទាន់ ហើយវាក៏នឹងជួយរក្សាស្ថិរភាពក្នុងតំបន់ផងដែរ ។

ដោយឡែកអ្នកសង្កេតការណ៍វិញមើលឃើញថា តៃវ៉ាន់ក៏អាចប្រឈមនឹងការលំបាកផងដែរក្នុងការទទួលបានគ្រាប់រំសេវ និងការផ្គត់ផ្គង់របស់របស់យោធាផ្សេងទៀតពីខាងក្រៅ ប្រសិនបើកងកម្លាំងចិនធ្វើការបិទផ្លូវអាកាស និងដែនសមុទ្រ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ តើលោក Putin ប្រើយុទ្ធសាស្ត្រអ្វី ទើបបញ្ចប់ការបះបោរប្រដាប់​អាវុធរបស់​ទាហានស៊ីឈ្នួល?