ក្រុមហ៊ុន OceanGate ប្រកាស ផ្អាកប្រតិបត្តិការទាំងស្រុង

ក្រុមហ៊ុន OceanGate ដែលជាម្ចាស់យានជ្រមុជទឹក Titan បានប្រកាស ផ្អាកសកម្មភាពរបស់ខ្លួនទាំងស្រុង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមហ៊ុនបានបង្ហោះសារមួយបន្ទាត់ នៅលើគេហទំព័ររបស់ខ្លួន ដោយនិយាយថា ក្រុមហ៊ុនសូមបញ្ឈប់ប្រតិបត្តិការរុករក និងពាណិជ្ជកម្មទាំងអស់។

ទោះបីជាយ៉ាងណាក៏ដោយ នៅលើគេហទំព័រនោះ ក្រុមហ៊ុនក៏បានផ្សព្វផ្សាយអំពីដំណើរទេសចរណ៍ទៅប្រជុំកោះ Azores នៃព័រទុយហ្គាល់និងប្រទេស បាហាម៉ា ផងដែរ។

សេចក្តីប្រកាសនេះ កើតឡើងចំពេលការស៊ើបអង្កេតមួយកំពុងបន្តទៅលើរបៀបដែលយាន Titan ផ្ទុះសម្លាប់មនុស្សចំនួន៥នាក់ ខណៈធ្វើដំណើរចុះទៅបាតមហាសមុទ្រអាត្លង់ទិក ដើម្បីទស្សនាខ្មោចកប៉ាល់ទីតានិក កាលពីថ្ងៃទី១៨ខែមិថុនា។

ដឹកនាំដោយឆ្មាំឆ្នេរសមុទ្រអាមេរិក អាជ្ញាធរនិយាយថា ការស៊ើបអង្កេតនេះ គឺមានគោលបំណងទប់ស្កាត់កុំឲ្យមានគ្រោះថ្នាក់ស្រដៀងគ្នា កើតឡើងនាពេលអនាគត។

ឆ្មាំសមុទ្រ បានរៀបចំការស៊ើបអង្កេតកម្រិតខ្ពស់បំផុតរបស់ខ្លួន ដែលនឹងអនុវត្តរួមគ្នាជាមួយអាជ្ញាធរកាណាដា ចក្រភពអង់គ្លេស និងបារាំង ហើយការស៊ើបអង្កេត នឹងអាចណែនាំឲ្យមានការចោទប្រកាន់រដ្ឋប្បវេណី ឬព្រហ្មទណ្ឌ។

គួររម្លឹកឡើងវិញ កាលពីថ្ងៃទី២៨ខែមិថុនា ឆ្មាំឆ្នេរសមុទ្រនិយាយថា កម្ទេចកម្ទីយាននិងបំណែកសាកសពមនុស្សពីយាន Titan ត្រូវបានរកឃើញ ហើយស្រង់ឡើងគោក។ កម្ទេចកម្ទី នឹង​ត្រូវ​យក​ទៅ​កាន់​កំពង់ផែ​សហរដ្ឋ​អាមេរិក ​ដើម្បី​ធ្វើ​ការ​វិភាគ​បន្ថែម​ទៀត៕

ប្រែសម្រួល៖ Vann Vann

ប្រភព៖ BBC

ចុចអាន៖ ធ្លាយព័ត៌មាន ក្រុមហ៊ុន OceanGate ជួលអ្នកហាត់ការរៀនមហាវិទ្យាល័យ មកឌីហ្សាញប្រព័ន្ធអគ្គិសនី យាន Titan