ដូណាល់ ត្រាំ អះអាងថា ចូ បៃដិន និងកូនប្រុស ប្រើកូកាអ៊ីន

អតីតប្រធានាធិបតីអាមេរិកលោក ដូណាល់ ត្រាំ បានវាយប្រហារប្រធានាធិបតីបច្ចុប្បន្នលោក ចូ បៃដិន និងកូនប្រុស ជុំវិញការរកឃើញកូកាអ៊ីននៅសេតវិមាន ដោយចោទប្រកាន់ថា សារធាតុនោះ អាចជាកម្មសិទ្ធិរបស់ពួកគេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាល​ពី​ថ្ងៃ​អាទិត្យ ទីភ្នាក់ងារ​​សម្ងាត់​បាន​រក​ឃើញកាបូប​តូចមួយ ​មាន​ផ្ទុក​ម្សៅ​ពណ៌ស ​នៅអគារ​ West Wing ដែលជាហេតុ​ជំរុញឲ្យ​មាន​ការ​ជម្លៀស​មនុស្សចេញ​ពី​សេតវិមាន។ ក្រោយ​មក មន្ត្រី​ទីភ្នាក់ងារ​សម្ងាត់​បាន​បញ្ជាក់​ប្រាប់ CNN ថា ម្សៅ​នោះ ​គឺ​ជា​កូកាអ៊ីន។

អត្ថាធិប្បាយលើបញ្ហានេះ អ្នកនាំពាក្យសេតវិមាន លោកស្រី Karine Jean-Pierre បាននិយាយថា រដ្ឋបាលលោក បៃដិន មានទំនុកចិត្តលើការស៊ើបអង្កេតនេះ នឹងឈានដល់ចំណុចសំខាន់ និងរកឃើញដើមចមនៃឧប្បត្តិហេតុនេះ ។

ទោះបីជាយ៉ាងណាក៏ដោយ អតីតប្រធានាធិបតីអាមេរិក លោក ដូណាល់ ត្រាំ បានលើកឡើងគំនិតផ្សេងអំពីឧប្បត្តិហេតុនេះ។

លោក ត្រាំ បានបង្ហោះសារលើបណ្តាញ “សច្ចធម៌សង្គម” របស់គាត់ កាលពីថ្ងៃព្រហស្បតិ៍ទី៦ខែកក្កដាថា “តើនរណាជឿថា កូកាអ៊ីនដែលរកឃើញនៅ West Wing ក្នុងសេតវិមាន នៅជិតការិយាល័យ Oval គឺសម្រាប់អ្នកប្រើប្រាស់ក្រៅពី ហាន់ធើ និង ចូ បៃដិន​ នោះ!”។

គាត់ក៏បានព្យាករដែរថា “សារព័ត៌មានក្លែងក្លាយ នឹងចាប់ផ្តើមនិយាយពី សារធាតុដែលរកឃើញនេះគឺ តិចតួចណាស់ហើយនឹងចុះផ្សាយថា វាមិនមែនជាកូកាអ៊ីនទេ ហើយបង្វែរវាជាថ្នាំអាស្ពីរីនទៅវិញ បន្ទាប់មករឿងរ៉ាវនេះនឹងរលាយបាត់”។

គួរបញ្ជាក់ជាថ្មី លោក ត្រាំ បានប្រកាសឈរឈ្មោះបោះឆ្នោតជាថ្មីកាលពីឆ្នាំមុន ដើម្បីតទល់ជាមួយលោក បៃដិន ហើយតាមការស្ទង់មតិចុងក្រោយបង្អស់​ អ្នកសាធារណរដ្ឋរូបនេះ កំពុងមានប្រជាប្រិយភាពខ្លាំងជាងគេ ឈានទៅរកការឈ្នះឆ្នោតប្រធានាធិបតី៕

ប្រែសម្រួល៖ Vann Vann

ប្រភព៖ RT

ចុចអាន៖ រកឃើញសារធាតុញៀនមួយប្រភេទនៅក្នុងបរិវេណ សេតវិមាន ខណៈការ ស៊ើបអង្កេតកំពុងធ្វើឡើង