៣០លានឆ្នាំទៀត ទ្វីបអាហ្វ្រិក នឹងប្រេះបែកជាពីរ បង្កើតបាន មហាសមុទ្រទីប្រាំមួយ

អ្នកវិទ្យាសាស្ត្របានព្រមានថា ស្នាមប្រេះដ៏ធំនៅអាហ្រ្វិក នឹងបំបែកទ្វីបនេះជាពីរ ហើយបង្កើតជាមហាសមុទ្រទីប្រាំមួយរបស់ផែនដី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បណ្តាប្រទេសនៅតាមបណ្តោយឆ្នេរសមុទ្រភាគអាគ្នេយ៍នឹង ក្លាយជាកោះដ៏ធំមួយ ដែលបង្កើតបានជាសមុទ្រថ្មីទាំងស្រុង ចាប់ពីប្រទេសអេត្យូពី រហូតដល់ប្រទេសម៉ូសំប៊ិក។

មែនទែនទៅ ស្នាមប្រេះនៅអាហ្វ្រិកខាងកើត បង្កើតឡើងកាលពី ២២ លានឆ្នាំមុនមកម្ល៉េះ ប៉ុន្តែទើបបង្ហាញសកម្មភាពក្នុងរយៈពេលប៉ុន្មានទសវត្សរ៍ចុងក្រោយនេះ ដោយសារតែមានស្នាមប្រេះមួយបានលេចឡើងនៅតាមបណ្តោយវាលខ្សាច់នៃប្រទេសអេត្យូពីនៅឆ្នាំ ២០០៥ ហើយកំពុងពង្រីកក្នុងទំហំ ២.៥៤ សង់ទីម៉ែត្រក្នុងមួយឆ្នាំ ។ វាគឺជាលទ្ធផលនៃផ្ទាំងតិកតូនិកចំនួនពីរ ដែលញែកចេញពីគ្នា។

ទន្ទឹមនោះ ការសិក្សាមួយដែលចេញផ្សាយកាលពីខែមិថុនា បានរកឃើញទៀតថា ការរុញច្រាននៃថ្មដែលមានកម្តៅក្តៅខ្លាំង ចេញពីស្នូលនៃភពផែនដីរបស់យើង ក៏កំពុងធ្វើឲ្យស្នាមប្រេះរីកកាន់តែធំផងដែរ។

ពាក់ព័ន្ធនឹងបញ្ហានេះដែរ លោក Ken Macdonald សាស្ត្រាចារ្យនៅសាកលវិទ្យាល័យកាលីហ្វ័រញ៉ា បានប្រាប់ DailyMail.com ថា “អ្វីដែលយើងមិនដឹងគឺថាតើ ការប្រេះនេះ នឹងបន្តក្នុងល្បឿនបច្ចុប្បន្នរបស់វា ដើម្បីបង្កើតជាមហាសមុទ្រ ដែរឬក៏យ៉ាងណា។ ដំបូងវាអាចបង្កើតបានប៉ុនសមុទ្រក្រហម ហើយក្រោយមកទៀត បង្កើតទៅជាអ្វីដែលកាន់តែធំ ដូចជាមហាសមុទ្រអាត្លង់ទិក ប៉ុន្តែទោះបីជាយ៉ាងណា ដើម្បីបង្កើតសមុទ្រដែលមានទំហំប៉ុនសមុទ្រក្រហមបច្ចុប្បន្ន គឺវាត្រូវចំណាយពេលប្រហែល ២០ ទៅ ៣០ លានឆ្នាំទៀតឯណោះ”៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ ផ្ទាំងទឹកកកទាំងអស់នៅ អាហ្វ្រិក នឹងរលាយបាត់ពីផែនដីក្នុងឆ្នាំ ២០៥០