ការស្រាវជ្រាវ៖ ទីក្រុងញូវយ៉ក កំពុងលិចចូលសមុទ្របន្តិចម្តងៗ ដោយសារមានសំណង់អគារខ្ពស់ៗ ច្រើនពេក

ការស្រាវជ្រាវថ្មីបានបង្ហាញថា កត្តារួមបញ្ចូលគ្នានៃសំណង់អគារខ្ពស់ៗ និងកម្ពស់ទឹកសមុទ្រកើនឡើង អាចធ្វើឲ្យទីក្រុងញូវយ៉ក ងាយប្រឈមនឹងគ្រោះមហន្តរាយធម្មជាតិ។ នេះបើតាមការចុះផ្សាយរបស់សារព័ត៌មាន Channel News Asia។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមមួយនៅសាកលវិទ្យាល័យ Rhode Island បានធ្វើការប៉ាន់ស្មានដ៏គួរឲ្យរន្ធត់ នៃទម្ងន់សរុបរបស់អគារជាង១លាន ដែលបង្កើតបានជាទីក្រុងញូវយ៉ក។

ពួកគេបានរកឃើញថា បេតុង ដែក និងកញ្ចក់ទម្ងន់រាប់ទ្រីលានគីឡូក្រាម កំពុងសង្កត់ដីឲ្យស្រុត ដែលបណ្តាលឲ្យវាលិចបន្តិចម្តងៗទៅក្រោមទឹកសមុទ្រ។

ទន្ទឹមនឹងនេះ កម្ពស់ទឹកសមុទ្រក៏កំពុងកើនឡើងផងដែរ ដោយសារការឡើងកម្តៅផែនដី និងបម្រែបម្រួលអាកាសធាតុ។

យោងតាមអង្គការ NASA, កម្រិតទឹកសមុទ្រជាមធ្យមរបស់ពិភពលោក បានកើនឡើងដល់ ១០សង់ទីម៉ែត្រ ចាប់តាំងពីឆ្នាំ១៩៩២មក ហើយគេព្យាករណ៍ថា វានឹងបន្តកើនឡើងចន្លោះពី ២០សង់ទីម៉ែត្រទៅ ៧៥សង់ទីម៉ែត្រ ក្នុងរយៈពេល២៥ឆ្នាំខាងមុខ។

បើតាមអត្រានេះ ញូវយ៉ក ត្រូវប្រឈមនឹងហានិភ័យនៃការលិចទីក្រុង។ ផ្លូវ Wall Street គឺមានកម្ពស់ត្រឹមតែ ១ទៅ២ម៉ែត្រប៉ុណ្ណោះ ពីលើនីវ៉ូទឹកសមុទ្រ។ Manhattan ត្រូវបានសាងសង់នៅលើថ្មដែលមិនសូវណែន ហើយ Brooklyn និង Queens មានដីមិនហាប់ ដែលបណ្តាលឲ្យការលិចកើតឡើងលឿនជាងមុន។

លើសពីនេះ ផ្នែកខ្លះនៃ Manhattan ត្រូវបានពង្រីក ដោយដោយការទន្ទ្រានដីនៅជិតឆ្នេរសមុទ្រ ដែលធ្វើឲ្យដីកាន់តែងាយរងគ្រោះទៅនឹងកម្លាំងទំនាញពីទម្ងន់នៃអគារ។

ជាលទ្ធផល ដីមួយចំនួននៅទីនោះ មានការលិចលឿនជាងមុនទ្វេដង ដែលមានអត្រារហូតដល់៤គីឡូម៉ែត្រក្នុងមួយឆ្នាំ។

អ្នកស្រាវជ្រាវព្រមានថា ថ្វីបើវាមិនទាន់មានការប្រកាសអាសន្ននៅឡើយក៏ដោយ ប៉ុន្តែពួកគេចង់ឲ្យអ្នកវិទ្យាសាស្ត្រ ជួយធ្វើផែនការអនាគត ឲ្យហើយ៕

ប្រែសម្រួល៖ Vann Vann

ប្រភព៖ CNA

ចុចអាន៖ ញូវយ៉ក ជួបការរញ្ជួយដី ដ៏កម្រ