អាមេរិក ធានាថា ប្រតិបត្តិការវាយបករបស់ អ៊ុយក្រែន លើ រុស្ស៊ី នឹងអូស​បន្លាយពេលច្រើនខែទៀត

រដ្ឋមន្ត្រីការបរទេសអាមេរិកលោក Antony Blinken បាននិយាយថា ប្រតិបត្តិការវាយបករបស់អ៊ុយក្រែនលើរុស្ស៊ីទំនងជានឹងអូសបន្លាយរយៈពេលជាច្រើនខែទៀត បន្ទាប់ពីអ៊ុយក្រែនដណ្ដើមបានមកវិញនូវទឹកដីដែលរុស្ស៊ីកំពុងកាន់កាប់ប្រហែល ៥០ ភាគរយ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងបទសម្ភាសន៍ជាមួយទូរទស្សន៍ CNN ដែលចាក់ផ្សាយកាលពីថ្ងៃអាទិត្យ, លោក Blinken ​បាន​និយាយ​ថា ប្រតិបត្តិការ​វាយបក​​របស់អ៊ុយក្រែនលើរុស្ស៊ី គឺទើបតែ​ស្ថិត​ក្នុង​ថ្ងៃ​ដំបូងប៉ុណ្ណោះ ដូច្នេះវានឹងអូសបន្លាយពេលជាច្រើនខែទៀត​ ។

រដ្ឋមន្ត្រីការបរទេសរូបនេះបានលើកឡើងទៀតថា “ទោះយ៉ាងណា កងកម្លាំងអ៊ុយក្រែនក៏កំពុងស្ថិតក្នុងការប្រយុទ្ធដ៏លំបាកមួយក្នុងការដណ្ដើមយកមកវិញនូវទឹកដីដែលបាត់បង់បន្ថែមទៀត ដោយសារតែខាងរុស្ស៊ីក៏បានដាក់កម្លាំងការពារយ៉ាងរឹងមាំផងដែរ ហើយយើងមិនអាចនិយាយ​លេងសើចបានទេដែលថា ការវាយបកមានរយៈពេល ២ ឬ ៣ សប្ដាហ៍នោះ ខ្ញុំគិតថា វានឹងមានរយៈពេលច្រើនខែទៀត” ។

លោក Blinken ក៏បាននិយាយផងដែរថា ប្រធានាធិបតីរុស្ស៊ីលោក Vladimir Putin បានបរាជ័យក្នុងការសម្រេចបាននូវគោលបំណងរបស់គាត់ក្នុងការលុបអ៊ុយក្រែនចេញពីផែនទី ដើម្បីលុបបំបាត់ឯករាជ្យភាព និងអធិបតេយ្យភាព ជាពិសេសគោលបំណងដាក់បញ្ចូលអ៊ុយក្រែនទៅក្នុងប្រទេសរុស្ស៊ី” ។

ដោយឡែក នៅពេលអ្នកសារព័ត៌មានសួរថាតើអ៊ុយក្រែននឹងទទួលបានយន្តហោះចម្បាំង F-16 តាមការស្នើសុំឬអត់នោះ, លោក Blinken បានឆ្លើយថា “រឿងនេះនឹងកើតឡើង ហើយពេលវេលាដែលពិតប្រាកដនោះ គឺនៅពេលដែលកងទ័ពអ៊ុយក្រែនត្រូវបានបណ្ដុះបណ្ដាលត្រឹមត្រូវឲ្យចេះបើកជាមុនសិន” ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ ពូទីន ថា លោកខាងលិចខកចិត្តលើ អ៊ុយក្រែន ដែលខំផ្ដល់អាវុធទៅឲ្យ ហើយ នៅតែបរាជ័យវាយបកលើ រុស្ស៊ី