ពូទីន ថា លោកខាងលិចខកចិត្តលើ អ៊ុយក្រែន ដែលខំផ្ដល់អាវុធទៅឲ្យ​ហើយ នៅតែបរាជ័យវាយបកលើ រុស្ស៊ី

ប្រធានាធិបតីរុស្ស៊ី លោក វ្ល៉ាឌីមៀរ ពូទីន បាននិយាយថា លោកខាងលិចមានការខកចិត្តជាខ្លាំង នោពេលដែលប្រតិបត្តិការវាយបករបស់ទីក្រុងកៀវមិនទទួលបានលទ្ធផលគាប់ប្រសើរណាមួយ ហើយថែមទាំងឈានទៅដល់ការស្លាប់ និងរបួសកងទ័ពអ៊ុយក្រែនក្នុងកម្រិតដ៏ខ្ពស់ផងដែរ ។

ថ្លែងក្នុងកិច្ច​ប្រជុំ​របស់​ក្រុម​ប្រឹក្សា​សន្តិសុខ​រុស្ស៊ីកាលពីថ្ងៃសុក្រ លោក ពូទីន បានលើកឡើងថា រដ្ឋាភិបាលទីក្រុងកៀវបានទទួលធនធានដ៏ច្រើនសន្ធឹកសន្ធាប់ រួមទាំងសព្វាវុធ ក៏ដូចជាទាហានស៊ីឈ្នួលរបស់លោកខាងលិច រួមជាមួយនឹងទីប្រឹក្សាបរទេសរាប់ពាន់នាក់ ប៉ុន្តែនៅតែបរាជ័យក្នុងប្រតិបត្តិការវាយបកមកលើរុស្ស៊ី ។

ទន្ទឹមនោះ មេដឹកនាំរុស្ស៊ីរូបនេះក៏បានកោតសរសើរចំពោះភាពក្លាហាន ការតាំងចិត្ត និងសមត្ថភាពរបស់ទាហានរុស្ស៊ីផងដែរ ជាពិសេសលោកថែមទាំងមើលស្រាលដល់សព្វាវុធយោធារបស់លោកខាងលិច ថាមានលក្ខណៈអន់ជាងអាវុធសម័យសូវៀតទៅទៀត ។

លោក ពូទីន បានបន្ថែមថា បណ្តាប្រទេសលោកខាងលិចបានបន្តផ្គត់ផ្គង់សព្វាវុធកាន់តែច្រើនដល់អ៊ុយក្រែន ដើម្បីធ្វើឲ្យរុស្ស៊ីទន់ដៃទន់ជើង និងអូសបន្លាយជម្លោះកាន់តែយូរទៅៗ ប៉ុន្តែឃ្លាំងអាវុធរបស់អង្គការណាតូនៅក្នុងរដ្ឋមួយចំនួន ក៏កំពុងតែខើចទៅៗផងដែរ ហើយមិនអាចផ្ដល់ឲ្យរដ្ឋាភិបាលទីក្រុងកៀវបានទាន់ចិត្តនោះទេ ដោយសារតែ​ផលិតកម្ម​យោធា​របស់លោក​ខាង​លិច​ត្រូវ​ការ​ពេល​វេលា និង​ការ​វិនិយោគ​ច្រើន ។

ប្រធានាធិបតីរុស្ស៊ីរូបនេះបញ្ជាក់ថា បច្ចុប្បន្នអ៊ុយក្រែនបានបាត់បង់ទាហានរាប់ម៉ឺននាក់ក្នុងប្រតិបត្តិការវាយបកប្រឆាំងនឹងទីតាំងការពាររបស់រុស្ស៊ី ហើយពេលនេះកម្លាំងទ័ពទីក្រុងកៀវក៏កំពុងបាក់ស្បាតផងដែរ បន្ទាប់ពីរុស្ស៊ីបើកការវាយឆ្មក់ផ្ទួនៗលើទីក្រុង និងភូមិនានារបស់អ៊ុយក្រែនក្នុងរយៈពេលប៉ុន្មានថ្ងៃថ្មីៗនេះ ។

គួរបញ្ជាក់ថា ការអះអាងរបស់លោក ពូទីន បានកើតឡើងត្រឹមតែប៉ុន្មានសប្ដាហ៍ប៉ុណ្ណោះ បន្ទាប់ពីសហរដ្ឋអាមេរិកប្រកាសផ្ដល់គ្រាប់បែកចង្កោម ដែលជាប្រភេទអាវុធត្រូវបានហាមប្រាមមិនឲ្យប្រើប្រាស់ពីសំណាក់ប្រទេសជាង ១០០ ទៅឲ្យរដ្ឋាភិបាលទីក្រុងកៀវដើម្បីប្រើប្រាស់ប្រឆាំងនឹងរុស្ស៊ីកាលពីដើមខែកក្កដានេះ ៕

ប្រែសម្រួលដោយ ៖ ជីវ័ន្ត

ប្រភព ៖ RT

ចុចអាន ៖ តើប្រព័ន្ធបាញ់រ៉ុកកែត “បិសាចជញ្ជក់ឈាម” ដែលអាមេរិក ត្រៀមផ្តល់ឲ្យអ៊ុយក្រែន ខ្លាំងកម្រិតណា?