ទោះលោក ថាក់ស៊ីន លើកពេលចូលស្រុកនៅថ្ងៃនេះ តែប៉ូលិស និងអាជ្ញាធរ​ពាក់ព័ន្ធបន្តប្រុងជើងការយាមកាម

បើទោះបីជាអតីតនាយករដ្ឋមន្ត្រីថៃលោក ថាក់ស៊ីន ស៊ីណាវ៉ាត់ត្រា ប្រកាសលើកពេលចូលស្រុកវិញក៏ដោយ ប៉ុន្តែប៉ូលិស និងអាជ្ញាធរអាកាសយានដ្ឋានដនមឿងក្នុងទីក្រុងបាងកក នៅតែប្រុងជើងការខ្ពស់សម្រាប់ការយាមកាមផងដែរ ។

ពាក់ព័ន្ធនឹងបញ្ហានេះដែរ មន្ត្រីជាន់ខ្ពស់មកពីការិយាល័យប៉ូលិសក្រុង និងការិយាល័យអន្តោប្រវេសន៍ ក៏បានជួបជាមួយមន្ត្រីមកពីក្រុមហ៊ុនអាកាសយានដ្ឋានថៃ ដើម្បីពិភាក្សាអំពីវិធានការសន្តិសុខយាមកាមនៅឯព្រលានយន្តហោះដដែល ។

ដើមឡើយលោក ថាក់ស៊ីន ដែលកំពុងរស់នៅនិរទេសខ្លួននៅក្រៅប្រទេស ចាប់តាំងពីខែសីហា ឆ្នាំ២០០៨ មក បានប្រកាសនឹងត្រលប់ចូលស្រុកវិញនៅថ្ងៃទី១០ ខែសីហានេះ ប៉ុន្តែអ្វីៗមានការប្រែប្រួលទៅវិញ ពោលលោក ថាក់ស៊ីន បានបង្ហោះលើបណ្ដាញសង្គម X ថា លោកសូមពន្យារពេលវិលត្រលប់ចូលមកប្រទេសថៃវិញ ដោយសារតែលោកត្រូវត្រួតពិនិត្យសុខភាព ។

រឿងរ៉ាវពន្យារពេលវិលត្រលប់ចូលស្រុកវិញរបស់លោក ថាក់ស៊ីន នេះដែរក៏កើតមានឡើង ស្របពេលដែលប្រទេសថៃកំពុងតស៊ូជម្នះភាពជាប់គាំងនយោបាយ បន្ទាប់ពីគណបក្សភឿថៃ ដែលជាគណបក្សធំទី ២ នៅក្នុងសភាជាន់ទាប ទើបតែប្រមែប្រមូលបានក្រុមចម្រុះចំនួន ៧ និងមានសំឡេង ២២៨ អាសនៈប៉ុណ្ណោះ ខណៈត្រូវការសំឡេងយ៉ាងតិច ៣៧៦ នៅក្នុងការបោះឆ្នោតសភាជុំបន្ទាប់ ដើម្បីក្លាយជានាយករដ្ឋមន្ត្រីទី ៣០ របស់ប្រទេសថៃ ក្រោយពេលដែលលោក ភីថា បានបាត់ឱកាសមាស ដោយសារតែគោលបំណងចង់កែប្រែច្បាប់ប្រមាថព្រះមហាក្សត្រ ។

គួរបញ្ជក់ថា គិតត្រឹមពេលនេះលោក ថាក់ស៊ីន បាន​ពន្យារ​ពេល​វិល​ត្រឡប់​ចូលស្រុក​វិញ​ចំនួន ២០ ដង​មកហើយ រាប់ចាប់តាំងពីការសន្យាចូលមកកាលពីដើមខែនេះផងដែរ បន្ទាប់ពីត្រូវបានទម្លាក់ចេញពីអំណាចក្នុងរដ្ឋប្រហារយោធាកាលពីឆ្នាំ ២០០៦ ហើយចាប់តាំងពីពេលនោះមកលោកបានរស់នៅក្នុងលក្ខណៈនិរទេសខ្លួនអស់រយៈពេល ១៧ ឆ្នាំមកហើយ ៕

ប្រែសម្រួលដោយ ៖ ជីវ័ន្ត

ប្រភព ៖ The Nation Thailand

ចុចអាន ៖ លោក ថាក់ស៊ីន ប្រាប់មូលហេតុដែលពន្យារពេលវិលចូលស្រុកនៅថ្ងៃទី១០ ខែសីហានេះ