ព័ត៌មានអន្ដរជាតិ

តុលាការធម្មនុញ្ញទុកពេលឲ្យលោក Pita ១ ខែទៀត ដើម្បីបញ្ជូនមេធាវីមកការពារក្ដីចង់កែប្រែច្បាប់ប្រមាថព្រះមហាក្សត្រ

បានផុស

៣ years មុន

នៅ

ថ្ងៃចន្ទ ១៤ សីហា ២០២៣

ដោយ

តុលាការធម្មនុញ្ញថៃបានយល់ព្រមទុកពេលឲ្យបក្សចលនាឆ្ពោះទៅមុខ និងមេដឹកនាំគណបក្សលោក Pita Limjaroenrat រយៈពេល ៣០ ថ្ងៃទៀត ដើម្បីបញ្ជូនមេធាវីមកដាក់ឯកសារការពារលើការចោទប្រកាន់ថា សំណើរបស់ពួកគេក្នុងការកែប្រែច្បាប់ប្រមាថព្រះមហាក្សត្រ គឺស្មើនឹងការប៉ុនប៉ងផ្តួលរំលំប្រព័ន្ធប្រជាធិបតេយ្យរបស់ប្រទេសដែលមានព្រះមហាក្សត្រជាប្រមុខរដ្ឋ ។

ប្រធានតុលាការធម្មនុញលោក Worawit Kangsasitiam បាននិយាយកាលពីពេលថ្មីៗនេះថា គណបក្សចលនាឆ្ពោះទៅមុខក៏បានស្នើសុំតុលាការពន្យារពេល ១៥ ថ្ងៃបន្ថែមទៀតផងដែរ ដោយសារតែមានឯកសារជាច្រើន ទើបត្រូវការពេលវេលាដើម្បីប្រមូលធ្វើជាព័ស្តុតាង ។

ប្រធានតុលាការរូបនេះលើកឡើងទៀតថា ទោះយ៉ាងណាច្បាប់មិនបានបញ្ជាក់ទេ តើតុលាការនឹងអាចផ្ដល់ការពន្យារពេលនេះបានប៉ុន្មានថ្ងៃនោះ ហើយតុលាការក៏អាចប្រើឆន្ទានុសិទ្ធិរបស់ខ្លួនផងដែរ នៅពេលដែលការស្នើសុំលើកពេលនេះ មានគោលបំណងពន្យាររឿងក្តី ។

លោក Worawit បានពន្យល់បន្ថែមថា ប្រសិនបើគណបក្សចលនាឆ្ពោះទៅមុខ ឬមេដឹកនាំរបស់បក្ស ពិតជាបានអនុវត្តសិទ្ធិសេរីភាពរបស់ពួកគេក្នុងការប៉ុនប៉ងផ្តួលរំលំរបបប្រជាធិបតេយ្យដូចការចោទប្រកាន់មែននោះ យ៉ាងហោចណាស់តុលាការធម្មនុញ្ញអាចបញ្ជាឲ្យពួកគេបញ្ឈប់សកម្មភាពបែបនេះបាន ។

លោកបន្ថែមថា តុលាការមិនមានសិទ្ធិរំលាយគណបក្សរបស់លោក Pita ក្នុងកាលៈទេសៈបែបនេះនោះទេ ព្រោះថា ការរំលាយគណបក្សត្រូវតែសម្រេចដោយគណៈកម្មការរៀបចំការបោះឆ្នោត រួចបញ្ជូនបន្តទៅតុលាការដើម្បីសម្រេចជាស្ថាពរ ។

គួរបញ្ជាក់ថា លោក Pita បានបាត់បង់ឱកាសមាសដើម្បីក្លាយជានាយករដ្ឋមន្ត្រីបន្ទាប់របស់ប្រទេសថៃកាលពីថ្ងៃទី១៣ ខែកក្កដា ក្រោយពេលមេបក្សចលនាឆ្ពោះទៅមុខរូបនេះ មិនអាចទទួលបានសំឡេងគាំទ្រគ្រប់គ្រាន់ពីសមាជិកព្រឹទ្ធសភាដែលត្រូវបានតែងតាំងដោយយោធានោះទេ ដោយសារតែគោលបំណងកែប្រែច្បាប់ប្រមាថព្រះមហាក្សត្រនេះឯង ៕