បក្សភឿថៃ ប្រាប់លោក ប្រាយុទ្ធ កុំទាន់អាលរុះរើមន្ត្រីរដ្ឋាភិបាល

មេដឹកនាំគណបក្សភឿថៃលោក Chonlanan Srikaew បាននិយាយថា គណបក្សភឿថៃបានជំរុញឲ្យរដ្ឋាភិបាលចាំផ្ទះរបស់លោកនាយករដ្ឋមន្ត្រី ប្រាយុទ្ធ ចាន់អូចា បញ្ឈប់ការផ្លាស់ប្ដូរមន្ត្រីរដ្ឋាភិបាលជាន់ខ្ពស់ ក្នុងអំឡុងពេលអន្តរកាលបច្ចុប្បន្ននេះ ។

ទន្ទឹមនោះ គណបក្សភឿថៃក៏បានជំរុញឲ្យលេខាធិការអចិន្ត្រៃយ៍នៃគ្រប់ក្រសួងទាំងអស់ពន្យារពេលការរុះរើមន្ត្រីជាន់ខ្ពស់រហូតដល់មានការណែនាំពីរដ្ឋាភិបាលថ្មី ដែលនឹងបង្កើតឡើងក្នុងពេលឆាប់ៗនេះ ។

នៅក្នុងសេចក្តីថ្លែងការណ៍មួយដែលបានចេញផ្សាយកាលពីពេលថ្មីៗនេះបានឲ្យដឹងថា គណបក្សភឿថៃដែលកំពុងព្យាយាមបង្កើតរដ្ឋាភិបាលថ្មី ក៏បានសំដៅទៅលើរដ្ឋធម្មនុញ្ញដែលដាក់កម្រិតដល់រដ្ឋាភិបាលចាំផ្ទះ មិនឲ្យអនុម័តគម្រោងដែលជាប់ទាក់ទងនឹងអ្នកស្នងតំណែង ជាពិសេសហាមឃាត់រដ្ឋាភិបាលចាំផ្ទះពីការរុះរើមន្ត្រីអចិន្ត្រៃយ៍ និងមន្ត្រីសហគ្រាសរដ្ឋផងដែរ ។

គណបក្ស​របស់កូនស្រីលោក ថាក់ស៊ីន បាន​ទទូចទៀត​ថា នេះ​ជា​ការអនុវត្ត​ដែល​រដ្ឋាភិបាល​ចាំផ្ទះ​ត្រូវ​តែធ្វើតាម ដោយសារតែមន្ត្រីរដ្ឋាភិបាលជាន់ខ្ពស់ ជាពិសេសលេខាធិការអចិន្ត្រៃយ៍ គឺជាធនធានដ៏សំខាន់សម្រាប់រដ្ឋាភិបាលដែលចូលកាន់តំណែងថ្មី ។

ជាចុងក្រោយនៅក្នុងសេចក្តីថ្លែងការណ៍ដដែលនោះ គណបក្សភឿថៃរំពឹងថា នឹងមានកិច្ចសហប្រតិបត្តិការល្អពីមន្ត្រីរដ្ឋាភិបាលទាំងអស់ ដើម្បីភាពប្រសើរឡើងសម្រាប់បម្រើដល់ម្ចាស់ឆ្នោត និងប្រទេសជាតិទាំងមូលតែម្ដង ៕

ប្រែសម្រួលដោយ ៖ ជីវ័ន្ត

ប្រភព ៖ Thai PBS

ចុចអាន ៖ លោក Pita អាចនឹងរួចផុតពីបណ្ដឹងកាន់កាប់ភាគហ៊ុនប្រព័ន្ធផ្សព្វផ្សាយ