តុលាការធម្មនុញ្ញ ថៃ បដិសេធមិនពិនិត្យមើលញត្តិដែលទាមទារឲ្យលោក Pita ឈរឈ្មោះជានាយករដ្ឋមន្ត្រីសាជាថ្មី

តុលាការធម្មនុញ្ញថៃនៅថ្ងៃពុធនេះបានច្រានចោលសំណើរបស់គណបក្សចលនាឆ្ពោះទៅមុខ ដើម្បីឲ្យពិនិត្យមើលឡើងវិញនូវសេចក្តីសម្រេចរបស់សភា ដែលបានរារាំងបេក្ខជននាយករដ្ឋមន្ត្រីរបស់ខ្លួនគឺលោក Pita Limjaroenrat មិនឲ្យឈរឈ្មោះបោះឆ្នោតលើកទី ២ ។

យោងតាមសេចក្ដីសម្រេចនេះ គឺមានន័យថា ក្ដីសង្ឃឹមរបស់គណបក្សចលនាឆ្ពោះទៅមុខក្នុងការបង្កើតរដ្ឋាភិបាលថ្មីនឹងត្រូវរលាយគ្មានសល់ ហើយវាក៏ជាការត្រួសត្រាយផ្លូវសម្រាប់សភាដើម្បីរៀបចំការបោះឆ្នោតថ្មីមួយផ្សេងទៀត ដើម្បីជ្រើសតាំងនាយករដ្ឋមន្រ្តី ដែលអាចនឹងប្រព្រឹត្តទៅនៅចន្លោះថ្ងៃទី១៨ ឬថ្ងៃទី១៩ ខែសីហានេះ ។

ទន្ទឹមនោះ សេចក្ដីសម្រេចរបស់តុលាការរដ្ឋធម្មនុញ្ញក្នុងការបដិសេធមិនទទួលយកករណីនេះទៀតសោត ក៏ដោយសារតែ ញត្តិនេះត្រូវបានដាក់មកដោយក្រុមបុគ្គលដែលមានសមាជិកជាង ២០ ប៉ុណ្ណោះ ពោលមិនមានបេក្ខជននាយករដ្ឋមន្ត្រីគឺលោក Pita ខ្លួនឯងនោះទេ ។

តុលាការធម្មនុញ្ញបញ្ជាក់ទៀតថា “​សិទ្ធិ​របស់​ពួកគេ​មិន​ត្រូវ​បាន​រំលោភ​បំពាននោះ​ទេ ប៉ុន្តែទោះជាយ៉ាងណា ​ពួកគេ​ក៏​មិន​មាន​សិទ្ធិ​ដាក់​ពាក្យ​បណ្ដឹងនោះ​ដែរ”។

គួរបញ្ជាក់ថា រហូតមកដល់ពេលនេះប្រទេសថៃបានស្ថិតនៅក្រោមរដ្ឋាភិបាលចាំផ្ទះអស់រយៈពេល ៥ ខែមកហើយ បន្ទាប់ពីគណបក្សចលនាឆ្ពោះទៅមុខ ដែលជាបក្សឈ្នះឆ្នោត មិនអាចបង្កើតរដ្ឋាភិបាលថ្មីបានឡើយ ក្រោយពេលដែលមិនទទួលបានសំឡេងគាំទ្រគ្រប់គ្រាន់ពីសមាជិកសភាដែលតែងតាំងដោយយោធា ៕

ប្រែសម្រួលដោយ ៖ ជីវ័ន្ត

ប្រភព ៖ CNA

ចុចអាន ៖ បក្សភឿថៃ ដាក់ចេញគោលនយោបាយ ៥ ចំណុច ធ្វើឲ្យពលរដ្ឋក្លាយជា អ្នកមាន មុនពេលចាស់ជរា