ចិន និងថៃ ត្រៀមធ្វើសមយុទ្ធយោធារួមគ្នា ដើម្បីប្រឆាំងនឹងអំពើភេរវកម្ម

ប្រភពព័ត៌មានបានឱ្យដឹងថា ចិន និងថៃ គ្រោងនឹងធ្វើសមយុទ្ធយោធារួមគ្នានៅខែសីហា និងខែកញ្ញា ដើម្បីប្រឆាំងនឹងអំពើភេរវកម្ម។

អ្នកនាំពាក្យក្រសួងការពារជាតិចិន លោកវរសេនីយ៍ឯក អ៊ូ ឈៀន (Wu Qian) បាននិយាយថា ចិន និងថៃ គ្រោងនឹងធ្វើសមយុទ្ធយោធារួមគ្នា ដើម្បីប្រឆាំងនឹងអំពើភេរវកម្ម ដែលនឹងធ្វើឡើងនៅប្រទេសថៃ នៅចន្លោះពាក់កណ្តាលខែសីហា និង ដើមខែកញ្ញា ឆ្នាំ២០២៣។

ការធ្វើសមយុទ្ធរួមគ្នានេះ ដែលអនុវត្តន៍ដោយកងទ័ពនៃប្រទេសទាំងពីរ ក្នុងគោលបំណងដើម្បីពង្រឹងកិច្ចសហប្រតិបត្តិការក្នុងការប្រឆាំងអំពើភេរវកម្ម និងរួមចំណែកលើកកម្ពស់សន្តិភាព និងសន្តិសុខក្នុងតំបន់។

ប្រភពដដែលបន្តថា លោកឧត្តមសេនីយ៍ឯក Li Shangfu រដ្ឋមន្ត្រីក្រសួងការពារជាតិចិនបានជួបពិភាក្សាការងារជាមួយ លោកឧត្តមសេនីយ៍ឯក ណារ៉ុងផាន់ ចិតកែវថេ មេបញ្ជាការកងទ័ពជើងគោកថៃនៅទីក្រុងប៉េកាំងកាលពីខែមិថុនាកន្លងទៅ ដោយលោក Li Shangfu បាននិយាយថា ចិនត្រៀមខ្លួនជាស្រេចដើម្បីធ្វើការជាមួយថៃ ដើម្បីអនុវត្តន៍ការឯកភាពសំខាន់ ដែលបានសម្រេចដោយមេដឹកនាំនៃប្រទេសទាំងពីរ និងជំរុញកិច្ចសហប្រតិបត្តិការរវាងកងទ័ពឱ្យចេញជាលទ្ធផលផ្លែផ្កាកាន់តែល្អប្រសើរ រួមទាំងការរក្សាស្ថិរភាពក្នុងតំបន់ជាមួយប្រទេសថៃ និងធានាសន្តិសុខនិរន្តរភាពក្នុងតំបន់ ក្នុងពេលដែលអាស៊ី-ប៉ាស៊ីហ្វិកកំពុងប្រឈមមុខនឹងបញ្ហាសន្តិសុខមួយចំនួន៕

ប្រែសម្រួល៖ គង់ សំអាន

ប្រភព៖ dailynews

ចុចអាន៖ អាមេរិក បារម្ភខ្លាំងអំពីទំនាក់ទំនង ដែលកាន់តែស្អិតរមួត រវាង ចិននិងរុស្ស៊ី