ថៃ គ្រោង​ផ្សព្វផ្សាយ​ប្រទេស​ខ្លួនជា​គោលដៅ​អាពាហ៍ពិពាហ៍​សម្រាប់គូស្នេហ៍មកពី ​ហុងកុង

លោកស្រី Pornmon Chansri ប្រធានការិយាល័យថ្មីនៃអាជ្ញាធរទេសចរណ៍ថៃ (TAT) ប្រចាំនៅហុងកុងបាននិយាយថា អាជ្ញាធរទេសចរណ៍ថៃ (TAT) គ្រោងនឹងផ្សព្វផ្សាយប្រទេសថៃជាទីតាំងអាពាហ៍ពិពាហ៍សម្រាប់គូស្នេហ៍មកពីហុងកុង ចាប់ពីឆ្នាំក្រោយ ។

លោកស្រី Pornmon បាននិយាយថា ការផ្សព្វផ្សាយប្រទេសថៃជាកន្លែងអាពាហ៍ពិពាហ៍សម្រាប់អ្នករស់នៅទីក្រុងហុងកុង នឹងអាចនាំឲ្យអាជ្ញាធរទេសចរថៃឈានដល់គោលដៅរបស់ខ្លួនក្នុងការស្វាគមន៍ភ្ញៀវទេសចរហុងកុងចំនួន ១ លាននាក់នៅឆ្នាំក្រោយ ។

ទន្ទឹមនោះ ការិយាល័យអាជ្ញាធរទេសចរថៃប្រចាំនៅហុងកុងបានរកឃើញថា គូស្វាមីភរិយាហុងកុងមានប្រហែល ៥០,០០០ គូ បានរៀបការជារៀងរាល់ឆ្នាំ ហើយ ១០ ភាគរយនៃពួកគេ ជាពិសេសគូរស្វាមីភរិយាវ័យក្មេង ពេញចិត្តនឹងការប្រារព្ធពិធីអាពាហ៍ពិពាហ៍នៅបរទេស ។

ចាប់ពីខែមករាដល់ខែកក្កដាឆ្នាំ ២០២៣ នេះមានភ្ញៀវទេសហុងកុងចំនួន ៤៥៤,០០៨ នាក់​បាន​មក​លេង​ប្រទេស​ថៃ ។ លើសពីនេះ ថៃមានបំណងចង់ឲ្យភ្ញៀវទេសចរហុងកុង ៧០ ម៉ឺននាក់មកទស្សនាមកកម្សាន្តនៅឆ្នាំនេះ ។

ជាមធ្យមភ្ញៀវទេសចរហុងកុងម្នាក់ចំណាយប្រហែល ២៨៥ ដុល្លារក្នុងមួយថ្ងៃ ឬប្រហែល ៨៥៥ ដុល្លារក្នុងមួយដំណើរក្នុងប្រទេសថៃ ។

បន្ថែមពីនេះ ថៃ​រំពឹងថា ក្រៅពីការបង្កើនចំនួនភ្ញៀវទេសចរហុងកុងដល់ ១ លាននាក់នៅឆ្នាំក្រោយហើយ ថៃក៏សង្ឃឹមថា ទេសចរហុងកុង នឹងចំណាយប្រហែល ១០ ភាគរយបន្ថែមទៀត ក្នុងអំឡុងពេលធ្វើដំណើររបស់ពួកគេ។

ដោយឡែក សម្រាប់គោលដៅកំពូលទាំងបួននៅក្នុងប្រទេសថៃសម្រាប់ភ្ញៀវទេសចរហុងកុង គឺទីក្រុងបាងកក ភូកេត កោះសាមុយ និងឈៀងម៉ៃ ៕

ប្រែសម្រួល៖ នាង រតនៈ

ប្រភព៖ The Nation Thailand