ជម្លោះរឿងគ្រឿងសមុទ្រ, ជប៉ុន គំរាមនាំ ចិន ទៅ WTO 

នៅថ្ងៃអង្គារទី២៩ខែសីហា ប្រទេសជប៉ុនបានគំរាមនាំចិន ឡើងទៅអង្គការពាណិជ្ជកម្មពិភពលោក (WTO) ដើម្បីតវ៉ាចំពោះបម្រាបរបស់ទីក្រុងប៉េកាំង ដែលហាមនាំចូលអាហារសមុទ្រទាំងអស់របស់ខ្លួន ក្រោយការបង្ហូរទឹកសំណល់ ចេញពីរោងចក្រថាមពលនុយក្លេអ៊ែរ Fukushima Daiichi។

រដ្ឋមន្ត្រីការបរទេសជប៉ុនលោក Yoshimasa Hayashi បានប្រាប់អ្នកសារព័ត៌មានថា ទីក្រុងតូក្យូ នឹងចាត់វិធានការចាំបាច់ លើការហាមឃាត់ផលិតផលជលផលដោយប្រទេសចិន ក្រោមលក្ខខណ្ឌផ្សេងៗ រួមទាំងក្របខ័ណ្ឌ WTO ផងដែរ។

ទន្ទឹមនោះ រដ្ឋមន្ត្រីសន្តិសុខសេដ្ឋកិច្ច លោកស្រី Sanae Takaichi បាននិយាយដោយឡែកថា ការដាក់ពាក្យប្តឹងទៅ WTO អាចនឹងក្លាយជាជម្រើសមួយ ប្រសិនបើការតវ៉ាទៅកាន់ប្រទេសចិន តាមរយៈផ្លូវការទូត មិនមានប្រសិទ្ធភាពទេនោះ។

ការអត្ថាធិប្បាយនេះ កើតឡើងខណៈបណ្តាអាជីវកម្មជប៉ុននិងកន្លែងសាធារណៈនានា បន្តទទួលទូរស័ព្ទរំខានពីលេខកូដ +86 របស់ចិន ដោយអ្នក Call មក បានត្អូញត្អែរអំពីការបញ្ចេញទឹកនៅហ្វូគូស៊ីម៉ា។

លោក Yasutoshi Nishimura រដ្ឋមន្ត្រីក្រសួងពាណិជ្ជកម្ម បាននិយាយក្នុងសន្និសីទសារព័ត៌មានមួយថា “វាពិតជាគួរឲ្យសោកស្តាយ និងព្រួយបារម្ភខ្លាំងណាស់ ចំពោះការហៅទូរស័ព្ទមកយាយីជាច្រើនលើកច្រើនសា ដែលទំនងជាមានប្រភពចេញពីប្រទេសចិន”៕

ប្រែសម្រួល៖ Vann Vann

ប្រភព៖​ Straits Times

ចុចអាន៖ ប្រធានាធិបតីកូរ៉េខាងត្បូង ទទួលទានគ្រឿងសមុទ្រ ដើម្បីធានាដល់ប្រជាជន កុំឲ្យព្រួយបារម្ភ