លោក Kishida ហៅរដ្ឋមន្ត្រីមួយក្រុម មកទទួលទានគ្រឿងសមុទ្រ យកពី ហ្វូគូស៊ីម៉ា ជាមួយគ្នា ដើម្បីធានាសុវត្ថិភាព

នាយករដ្ឋមន្ត្រីជប៉ុនលោក Fumio Kishida និងរដ្ឋមន្ត្រីមួយចំនួន បានទទួលទានអាហារសមុទ្រដែលយកមកពីសមុទ្រនៃខេត្ត ហ្វូគូស៊ីម៉ា ខណៈមជ្ឈដ្ឋានជាច្រើនខឹងសម្បា និងបង្ហាញក្តីបារម្ភក្រោយជប៉ុន បង្ហូរទឹកសំណល់ចេញពីរោងចក្រថាមពលនុយក្លេអ៊ែរ ចូលមហាសមុទ្រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាក់ស្តែង ការទទួលទានអាហារថ្ងៃត្រង់មួយពេលនេះ មានគោលបំណងរំងាប់ក្តីបារម្ភ អំពីផលប៉ះពាល់អវិជ្ជមានលើសុខភាពមនុស្ស និងស្តារកេរ្តិ៍ឈ្មោះឡើងវិញ ចំពោះផលនេសាទពីតំបន់ជុំវិញខេត្តភាគឦសានប្រទេសជប៉ុន។

បន្ទាប់ពីជំនួបនៅទីស្តីការនាយករដ្ឋមន្ត្រី, រដ្ឋមន្ត្រីសេដ្ឋកិច្ច ពាណិជ្ជកម្ម និងឧស្សាហកម្មទទួលបន្ទុកគោលនយោបាយនុយក្លេអ៊ែរ លោក Yasutoshi Nishimura និយាយថា លោក Kishida បានបរិភោគ sashimi, ត្រីអណ្ដាតឆ្កែសមុទ្រ និងមឹក ដែលយកមកពីតំបន់ ហ្វូគូស៊ីម៉ា។

លោក Nishimura ប្រាប់អ្នកយកព័ត៌មានបន្ទាប់ពីកិច្ចប្រជុំនេះថា យើងចាំបាច់ត្រូវធានាអះអាងដល់ប្រជាជនទាំងក្នុងនិងក្រៅប្រទេស អំពីសុវត្ថិភាពនៃគ្រឿងសមុទ្រ ដែលនេសាទបានពីសមុទ្រក្បែរបរិវេណនុយក្លេអ៊ែរ ហ្វូគូស៊ីម៉ា។

គួរបញ្ជាក់ជាថ្មី កាលពីថ្ងៃព្រហស្បតិ៍សប្តាហ៍មុន ប្រទេសជប៉ុន បានចាប់ផ្តើមបញ្ចេញទឹកដែលសម្អាតរួចពីរោងចក្រថាមពលនុយក្លេអ៊ែរ Fukushima Daiichi ចូលទៅក្នុងមហាសមុទ្រប៉ាស៊ីហ្វិក។

រដ្ឋាភិបាលទីក្រុងតូក្យូអះអាងថា សារធាតុវិទ្យុសកម្មភាគច្រើន លើកលែងតែ Tritium ប៉ុណ្ណោះ គឺត្រូវបានសម្អាតអស់ពីទឹក តាមរយៈដំណើរការបន្សុទ្ធ មុនពេលបង្ហូរចេញ៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Asian Nikkei

ចុចអាន៖ ប្រធានាធិបតីកូរ៉េខាងត្បូង ទទួលទានគ្រឿងសមុទ្រ ដើម្បីធានាដល់ប្រជាជន កុំឲ្យព្រួយបារម្ភ