ព្យុះសង្ឃរា Idalia វាយប្រហាររដ្ឋ Florida ពេញទំហឹង បង្កការបំផ្លិចបំផ្លាញ និងបណ្តាលឲ្យមនុស្សស្លាប់

​ទីក្រុងមួយចំនួនក្នុងរដ្ឋ Florida ត្រូវជន់លិច​បន្ទាប់​ពី​ព្យុះសង្ឃរា Idalia វាយប្រហារ ហើយពេលនេះ ព្យុះកំពុងបោះពួយទៅកាន់រដ្ឋ Georgia ជាបន្តទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ព្យុះបិសាចនេះ ត្រូវបានបន្ទាបទៅជាព្យុះសង្ឃរាប្រភេទទី១ ពេលវាទៅដល់ដីគោកជាមួយល្បឿន១២០គីឡូម៉ែត្រក្នុងមួយម៉ោង ដោយសំដៅទៅវាយសន្ធាប់ផ្ទាល់ លើទីក្រុងប្រវត្តិសាស្រ្ត Savannah ខណៈគិតត្រឹមពេលនេះ​ មានមនុស្ស ២ នាក់ត្រូវបាត់បង់ជីវិត ដោយសារព្យុះ Idalia។

ទន្ទឹមនោះ កម្ពស់ទឹកនៅឆ្នេរ Tampa Bay បានកើនឡើងលើស ១.៣៧ ម៉ែត្រកាលពីព្រឹកថ្ងៃពុធ ពោលគឺលើសពីកម្រិតទឹកខ្ពស់លើកមុនដែលបង្កឡើងដោយព្យុះត្រូពិក Eta ក្នុងឆ្នាំ ២០២០ ទៅទៀត ។

ស្របពេលជាមួយគ្នានេះ អ្នករដ្ឋ Florida ត្រូវបានគេមើលឃើញនាំគ្នាហែលទឹកចេញតាមបង្អួចផ្ទះ ដើម្បីជម្លៀសខ្លួន ខណៈកម្រិតទឹកឡើងខ្ពស់ ហើយ Idalia ក៏ត្រូវបានគេកត់ត្រាដែរថា ​ជា​ព្យុះ​​ខ្លាំង​បំផុត​ដែល​​បោកបក់​នៅ​តំបន់ Big Bend ក្នុង​រយៈពេល ១២៧ ឆ្នាំ ។

យោងតាមគេហទំព័រ PowerOutage.us បានឲ្យដឹងថា អតិថិជនជាង ២៦៥ ០០០ នាក់នៅរដ្ឋ Florida និង ១០៥ ០០០ នាក់នៅ Georgia គឺមិនមានអគ្គិសនីប្រើប្រាស់ឡើយ ខណៈអាកាសយានដ្ឋានអន្តរជាតិ Tampa និងកំពង់ផែ ក៏ត្រូវបិទផងដែរ៕

ប្រែសម្រួល៖ Vann Vann

ប្រភព៖ CNA, Daily Mail

ចុចអាន៖ ព្យុះកំណាច Idalia កំពុងហោះសំដៅទៅរដ្ឋ Florida ខណៈតំបន់ចំនួន៤៩ ត្រូវប្រកាសអាសន្ន