មុនទៅដល់ ឥណ្ឌា ដើម្បីចូលរួមកិច្ចប្រជុំ G20 តើយន្តហោះដឹកលោក បៃដិន ឈប់ចាក់សាំងនៅប្រទេសណា?

ប្រធានាធិបតីសហរដ្ឋអាមេរិកលោក ចូ បៃដិន បានអញ្ជើញទៅដល់ប្រទេសឥណ្ឌាហើយដើម្បីចូលរួមកិច្ចប្រជុំកំពូលក្រុមប្រទេស G20 ខណៈយន្តហោះ Air Force One ដែលដឹកលោក បៃដិន ក៏បានឈប់ចាក់ប្រេងសាំងនៅពាក់កណ្ដាលផ្លូវផងដែរ ។

យោងតាមសេតវិមានបានឲ្យដឹងថា យន្តហោះ Air Force One ដែលដឹកលោកប្រធានាធិបតី ចូ បៃដិន បានចាកចេញពីមូលដ្ឋានទ័ពអាកាស Andrews កាលពីថ្ងៃព្រហស្បតិ៍ និងទៅដល់រដ្ឋធានីញូវដែលីកាលពីល្ងាចថ្ងៃសុក្រ ទី៨ ខែកញ្ញា បានឈប់ចាក់ប្រេងសាំងនៅឯមូលដ្ឋានទ័ពអាកាស Ramstein ក្នុងប្រទេសអាល្លឺម៉ង់ ។

យន្តហោះ Air Force One ដែលដឹកលោក ចូបៃដិន និងបានហោះហើរចេញពីមូលដ្ឋានទ័ពអាកាស Andrews ត្រូវធ្វើដំណើរចម្ងាយ ៦,៤៨៦ គីឡូម៉ែត្រក្នុងរយៈពេល ៨ ម៉ោងដើម្បីទៅដល់មូលដ្ឋានទ័ពអាកាស Ramstein មុនហោះហើរបន្តទៅដល់រដ្ឋធានីញូវដែលីប្រទេសឥណ្ឌា ។

ទន្ទឹមនោះ នេះក៏ជាដំណើរទស្សនកិច្ចលើកដំបូងរបស់លោក បៃដិន ទៅកាន់ប្រទេសឥណ្ឌាក្នុងនាមជាប្រធានាធិបតីសហរដ្ឋអាមេរិក ខណៈលោកក៏នឹងទន្ទឹងរង់ចាំស្វាគមន៍សហភាពអាហ្វ្រិកជាសមាជិកភាពអចិន្ត្រៃយ៍ក្នុងប្លុកនៃក្រុមប្រទេសសេដ្ឋកិច្ចជឿនលឿនទាំង ២០ នេះផងដែរ ។

ចំណែកពាក់ព័ន្ធនឹងកិច្ចប្រជុំកំពូលនៃក្រុមប្រទេស G20 ដែលរដ្ឋធានីញូវដែលីរបស់ប្រទេសឥណ្ឌាធ្វើជាម្ចាស់ផ្ទះរៀបចំ ក៏បានដាក់ពង្រាយកម្លាំងប៉ូលិសប្រមាណ ៨ ម៉ឺននាក់សម្រាប់ការការពារសន្តិសុខសុវត្ថិភាព ខណៈតំបន់ជុំវិញវិមានប្រវត្តិសាស្ត្រ India Gate ដែលជាកន្លែងទាក់ទាញទេសចរណ៍ដ៏ល្បីល្បាញត្រូវបានបិទផងដែរ ។

គួរបញ្ជាក់ថា សម្រាប់ជំនួបកំពូលលើកនេះ ប្លុក G20 បានផ្តោតកិច្ចពិភាក្សាលើការផ្តល់ប្រាក់កម្ចីបន្ថែមទៀតដល់ប្រទេសកំពុងអភិវឌ្ឍពីស្ថាប័នពហុភាគី, កំណែទម្រង់ស្ថាបត្យកម្មបំណុលអន្តរជាតិ, បទប្បញ្ញត្តិស្តីពីរូបិយប័ណ្ណឌីជីថល និងផលប៉ះពាល់នៃភាពមិនប្រាកដប្រជាភូមិសាស្ត្រនយោបាយលើសន្តិសុខស្បៀង និងថាមពល ៕

ប្រែសម្រួលដោយ ៖ ជីវ័ន្ត

ប្រភព ៖ The Economic Times

ចុចអាន ៖ តើមេដឹកនាំណាខ្លះចូលរួម និងអវត្តមាន ក្នុងកិច្ចប្រជុំកំពូល G20 នៅ ឥណ្ឌា?