លោក ពូទីន ថា រុស្ស៊ី មិនចាំបាច់ត្រូវការទាហានស៊ីឈ្នួលបរទេសមកប្រយុទ្ធ​លើសមរភូមិឡើយ

ប្រធានាធិបតីរុស្ស៊ីលោក វ្ល៉ាឌីមៀរ ពូទីន បាននិយាយកាលពីពេលថ្មីៗនេះថា រុស្ស៊ីមិនត្រូវការទាហានស៊ីឈ្នួលបរទេសនោះទេ ដោយសារតែរុស្ស៊ីមានជនជាតិខ្លួនឯងប្រមាណ ៣០ ម៉ឺននាក់ហើយបានចុះកិច្ចសន្យាស្ម័គ្រចិត្តចូលបម្រើយោធាត្រឹមឆ្នាំនេះ ។

លោក ពូទីន បានថ្លែងប្រាប់អ្នកសារព័ត៌មាននៅទីក្រុង Sochi បន្ទាប់ពីជំនួបជាមួយប្រធានាធិបតីបេឡារុសលោក Alexander Lukashenko ថា “វាជាការសមហេតុសមផលណាស់ដែលរុស្ស៊ីមិនចាំបាច់ហៅមនុស្សមកពីបរទេសសម្រាប់ប្រតិបត្តិការប្រយុទ្ធរបស់យើងនោះទេ” ។

លោក ពូទីន បានលើកឡើងថា “គិតត្រឹមព្រឹកនេះ មានទាហានចុះកិច្ចសន្យាចំនួន ៣០ ម៉ឺននាក់ ហើយសុទ្ធតែអ្នកស្នេហាជាតិខ្ពស់បំផុត ជាពិសេសទាហានស្ម័គ្រចិត្ត​ទាំង​នោះ​ក៏​ត្រូវ​បាន​បំពាក់​ដោយអាវុធ​ទំនើបៗ និងឧបករណ៍ផ្សេងៗផង​ដែរ” ។

នៅដើមខែកក្កដា ក្រសួងការបរទេសរុស្ស៊ីបានប៉ាន់ប្រមាណថា ទាហានស៊ីឈ្នួលបរទេសជិត ១២,០០០ នាក់បានចូលរួមជាមួយកងកម្លាំងប្រដាប់អាវុធអ៊ុយក្រែន ចាប់តាំងពីផ្ទុះជម្លោះនៅក្នុងខែកុម្ភៈ ឆ្នាំ ២០២២ ប៉ុន្តែបច្ចុប្បន្នមានទាហានសកម្មតែ ២,២០០ នាក់ប៉ុណ្ណោះ ។

យោងតាមរដ្ឋាភិបាលទីក្រុងមូស្គូបានឲ្យដឹងថា ចំណែកទាហានស៊ីឈ្នួលជិត ១ ម៉ឺននាក់ផ្សេងទៀត បានបាត់បង់ជីវិត ឬចាកចេញពីសមរភូមិតប្រយុទ្ធនៅអ៊ុយក្រែន ដោយសារតែរដ្ឋាភិបាលទីក្រុងកៀវបានប្រើប្រាស់ទាហានស៊ីឈ្នួលទាំងនោះជាផ្ទាំងស៊ីបសម្រាប់កាណុងកាំភ្លើងរបស់រុស្ស៊ី ។

ជាក់ស្ដែងលោក ពូទីន បានប៉ាន់ប្រមាណកាលពីដើមសប្តាហ៍នេះថា អ៊ុយក្រែនបានបាត់បង់កម្លាំងទ័ពចំនួន ៧១,០០០ នាក់ក្នុងរយៈពេលត្រឹមតែ ៣ ខែនៃ “ប្រតិបត្តិការវាយបក” រួមជាមួយនឹងគ្រឿងសឹក និងសម្ភារៈដែលផ្តល់ដោយលោកខាងលិចជាច្រើនផ្សេងទៀតផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ RT

ចុចអាន ៖ កងសន្តិសុខលោក គីម ជុងអ៊ុន បាញ់ថ្នាំសម្លាប់មេរោគលើកៅអីខ្លាចមាន​ជាតិពុល មុនអង្គុយប្រជុំជាមួយលោក ពូទីន (មានវីដេអូ)