តើអ្នកទោសដែលអាមេរិកនិងអ៊ីរ៉ង់ ដោះដូរគ្នា មាននរណាខ្លះ?

ជនជាតិអាមេរិកចំនួនប្រាំនាក់ ដែលជាប់ឃុំនៅក្នុងប្រទេសអ៊ីរ៉ង់ ត្រូវបានដោះលែងវិញហើយកាលពីថ្ងៃចន្ទទី១៨ខែកញ្ញា ជាផ្នែកមួយនៃកិច្ចព្រមព្រៀងរបស់រដ្ឋបាលលោក ចូ បៃដិន ជាមួយប្រទេសអ៊ីរ៉ង់ ក្នុងការឈប់បង្កកប្រាក់ ៦ពាន់លានដុល្លារជាថ្នូរនឹងសេរីភាពរបស់អ្នកទោសទាំងនោះ។

អ្នកទាំង៥ បានធ្វើដំណើរចេញពីទីក្រុងតេហេរ៉ង់ តាមយន្តហោះកាតា ទៅកាន់ទីក្រុងដូហា រួចនឹងបន្តដំណើរ​ទៅកាន់​ទីក្រុង​វ៉ាស៊ីនតោន​។ នេះបើតាមការបញ្ជាក់ពីមន្ត្រីជាន់ខ្ពស់មួយរូប។

ជនជាតិ​អាមេរិក​ទាំង​៥​ ​ត្រូវ​បាន​កាត់ទោស​ក្នុង​ប្រទេស​អ៊ីរ៉ង់ ​ឲ្យ​ជាប់​ពន្ធនាគារ​១០​ឆ្នាំ​លើ​បទ​ចោទ​ប្រកាន់​ចារកម្ម​ខុសៗ​គ្នា។

ដូចនេះ តើពួកគេជានរណាខ្លះ?

Siamak Namazi

សារព័ត៌មាន BBC News រាយការណ៍ថា លោក Namazi អាយុ៥១ឆ្នាំ គឺជាអ្នកជំនួញជនជាតិអាមេរិក ដើមកំណើតអ៊ីរ៉ង់ ត្រូវបានចាប់ខ្លួនក្នុងឆ្នាំ២០១៥ ហើយកាត់ទោសឲ្យជាប់ពន្ធនាគារ ១០ឆ្នាំជាមួយឪពុកឈ្មោះ Baquer ពីបទ “សហការជាមួយសត្រូវបរទេស”។

Morad Tahbaz

យោងតាមសារព័ត៌មាន The Associated Press បានឲ្យដឹងថា លោក Tahbaz ដែលជាអ្នកអភិរក្សជនជាតិអាមេរិកដើមកំណើតអ៊ីរ៉ង់ ត្រូវបានចាប់ខ្លួនក្នុងឆ្នាំ២០១៨ ហើយក៏ទទួលការកាត់ទោសជាប់ពន្ធនាគាររយៈពេល១០ឆ្នាំផងដែរ។

សារព័ត៌មាន BBC រាយការណ៍ថា លោក Tahbaz អាយុ៦៧ឆ្នាំត្រូវបានចាប់ខ្លួន រួមជាមួយអ្នកអភិរក្សជនជាតិអ៊ីរ៉ង់៨នាក់ផ្សេងទៀត ដែលត្រូវបានចោទប្រកាន់ពីបទចារកម្ម បន្ទាប់ពីប្រើកាមេរ៉ាដើម្បីតាមដានសត្វខ្លាអាស៊ីជិតផុតពូជ។

Emad Shargi

សារព័ត៌មាន CBS News រាយការណ៍ថា លោក Shargi អាយុ៥៦ឆ្នាំ កើតនៅក្នុងប្រទេសអ៊ីរ៉ង់ ប៉ុន្តែបានចាកចេញពីកាលពីក្មេង។ បន្ទាប់ពីគាត់ និងប្រពន្ធ ផ្លាស់ទីលំនៅទៅនៅប្រទេសអ៊ីរ៉ង់ Shargi ត្រូវបានឃុំខ្លួនក្នុងខែមេសា ឆ្នាំ ២០១៨ ប៉ុន្តែត្រូវដោះលែងឲ្យនៅក្រៅឃុំ ហើយ ៨ខែក្រោយមក ការចោទប្រកាន់លើរូបគាត់ត្រូវបានទម្លាក់ចោល។ គាត់​ត្រូវ​បាន​ចាប់​ខ្លួន​ជា​លើក​ទី​ពីរ​ក្នុង​ឆ្នាំ ២០២០ ហើយ​​កាត់​ទោស​ឲ្យ​ជាប់ពន្ធនាគារ ១០ឆ្នាំ​ពី​បទ​ចោទ​ប្រកាន់​ចារកម្ម។

អ្នកទោស២នាក់ទៀត មិនបញ្ចេញអត្តសញ្ញាណ

ជនជាតិអាមេរិក២នាក់ ដែលត្រូវដោះលែង បានសុំមិនបញ្ចេញឈ្មោះ ថ្វីបើ CBS News បានរាយការណ៍ថា បុគ្គលម្នាក់ក្នុងចំណោមនោះ មានភេទស្រី ជាអតីតបុគ្គលិកអង្គការសហប្រជាជាតិក៏ដោយ។

ចំណែកអ្នកទោសអ៊ីរ៉ង់ទាំង៥នាក់ ដែលអាមេរិកដោះលែងមានដូចជា Mehrdad Moein Ansari, Kambiz Attar Kashani, Reza Sarhangpour-Kafrani, Amin Hassanzadeh និង Kaveh Lotfolah Afrasiabi៕

ប្រែសម្រួល៖ Vann Vann

ប្រភព៖ The Hill

ចុចអាន៖ អាមេរិក បញ្ជូនទ័ព ៣០០០នាក់ទៅមជ្ឈិមបូព៌ា ដើម្បីកំញើញ អ៊ីរ៉ង់