ឥណ្ឌា ព្រមានពលរដ្ឋខ្លួននៅ កាណាដា ឲ្យប្រយ័ត្ន

ប្រទេសឥណ្ឌា បានជំរុញឲ្យពលរដ្ឋរបស់ខ្លួនដែលធ្វើដំណើរទៅឬរស់នៅក្នុងប្រទេសកាណាដា ត្រូវប្រុងប្រយ័ត្នឲ្យបានខ្ពស់បំផុត។

ការណែនាំនេះ ធ្វើឡើងមួយថ្ងៃ ក្រោយប្រទេសទាំងពីរ មានភាពតានតឹងជាមួយគ្នាកាន់តែខ្លាំង ដោយភាគីទាំងសងខាង បានបណ្តេញអ្នកការទូតគ្នាទៅវិញទៅមក ដើម្បីសងសឹក។

ប្រទេសកាណាដានិយាយថា ខ្លួនកំពុងស៊ើបអង្កេត ការចោទប្រកាន់ដ៏គួឲ្យជឿទុកចិត្តមួយ ដែលភ្ជាប់រដ្ឋឥណ្ឌា ទៅនឹងការសម្លាប់មេដឹកនាំផ្តាច់ខ្លួន Sikh។

ទោះបីជាយ៉ាងណាក៏ដោយ ឥណ្ឌា​បាន​បដិសេធ​យ៉ាង​ដាច់​អហង្ការ​ ចំពោះ​ការ​ចោទ​ប្រកាន់​នេះ ដោយ​ហៅ​ថា ​មិន​សម​ហេតុ​ផល។

កាល​ពី​ថ្ងៃ​ពុធទី២០ខែកញ្ញា ក្រសួង​ការ​បរទេស​​ឥណ្ឌា​​និយាយ​ថា ខ្លួន​បាន​ចេញ​ការព្រមានដល់ពលរដ្ឋរបស់ខ្លួន ដោយសារ​មើល​ឃើញ​ពី​ការ​កើន​ឡើង​នៃ​សកម្មភាព​ប្រឆាំង​​ឥណ្ឌា និង​ឧក្រិដ្ឋកម្ម​ស្អប់​ខ្ពើម​ខាង​នយោបាយ ក៏ដូចជា​អំពើ​ហិង្សា​ឧក្រិដ្ឋកម្មនៅ​ក្នុង​ប្រទេស​កាណាដា។

ជារឿយៗ រដ្ឋាភិបាលឥណ្ឌាបានប្រតិកម្មយ៉ាងខ្លាំង ចំពោះការទាមទារដោយក្រុមផ្តាច់ខ្លួន Sikh នៅក្នុងប្រទេសលោកខាងលិច ដើម្បីបំបែកតំបន់ Khalistan ឬស្រុកកំណើត Sikh។

ចលនា Khalistan បានឡើងដល់កំពូលក្នុងប្រទេសឥណ្ឌាអំឡុងទសវត្សរ៍ឆ្នាំ១៩៨០ ជាមួយនឹងការបះបោរដ៏ហិង្សាមួយ នៅកណ្តាលរដ្ឋ Punjab ដែលភាគច្រើនជាជនជាតិ Sikh៕

ប្រែសម្រួល៖ Vann Vann

ប្រភព៖ BBC

ចុចអាន៖ ឥណ្ឌានិងកាណាដា តឹងសរសៃ.ក ដាក់គ្នា ពាក់ព័ន្ធការស្លាប់ មេដឹកនាំចលនាបំបែកខ្លួន