អាមេរិក ប្រកាសកញ្ចប់ជំនួយយោធាថ្មី តម្លៃ១២៨លានដុល្លារ សម្រាប់អ៊ុយក្រែន

នៅថ្ងៃសុក្រទី២២ខែកញ្ញា ប្រធានាធិបតីអាមេរិក លោក ចូ បៃដិន បានប្រកាសកញ្ចប់ជំនួយថ្មីសម្រាប់អ៊ុយក្រែន ដែលក្នុងនោះរួមបញ្ចូលទាំងខែលការពារដែនអាកាស Hawk ទីពីរ និងការចែកចាយប្រព័ន្ធអាវុធបន្ថែមប្រចាំខែ ក្នុងអំឡុងរដូវរងាផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក បៃដិន ប្រកាសថា សហរដ្ឋអាមេរិក រួមទាំងសម្ព័ន្ធមិត្ត នឹងបន្តផ្តល់ប្រព័ន្ធសន្តិសុខឲ្យអ៊ុយក្រែន ដើម្បីគាំទ្រដល់វឌ្ឍនភាពរបស់ប្រទេសនេះ ក្នុងការដណ្តើមយកទឹកដីរបស់ខ្លួនមកវិញ។

ជំនួយយោធាថ្មីបំផុតដែលមានតម្លៃ១២៨លានដុល្លារនេះ ក៏រួមបញ្ចូលផងដែរ នូវមីស៊ីលបាញ់ពីអាកាសទៅអាកាស AIM-9M Sidewinder, ប្រព័ន្ធការពារដែនអាកាស Avenger, គ្រាប់បែកចង្កោម និងគ្រាប់រំសេវជាច្រើនទៀត សម្រាប់ប្រព័ន្ធរ៉ុកកែតបាញ់បានច្រើនគ្រាប់ HIMARS របស់អ៊ុយក្រែន។

លោក បៃដិន និយាយថា “យើងក៏ផ្តោតលើការពង្រឹងសមត្ថភាពការពារដែនអាកាសរបស់អ៊ុយក្រែន ដើម្បីការពារហេដ្ឋារចនាសម្ព័ន្ធសំខាន់ៗ ដែលផ្តល់កម្តៅនិងពន្លឺ ក្នុងអំឡុងពេលថ្ងៃត្រជាក់បំផុតនិងងងឹតបំផុតនៃឆ្នាំនេះផងដែរ”។

សេចក្តីប្រកាសនេះ កើតឡើងខណៈលោក បៃដិន ក៏ចង្អុលបង្ហាញផងដែរថា រថក្រោះ Abrams ជើងដំបូងបង្អស់ ដែលផ្គត់ផ្គង់ដោយសហរដ្ឋអាមេរិក នឹងទៅដល់ដៃអ៊ុយក្រែននៅសប្តាហ៍ក្រោយ បន្ទាប់ពីសហរដ្ឋ​អាមេរិក ​បាន​សន្យា​បញ្ជូន​រថក្រោះប្រភេទនេះចំនួន ៣១ គ្រឿង​ទៅ​ឲ្យអ៊ុយក្រែន។

ហើយការប្រកាសនេះ ក៏ធ្វើឡើងផងដែរ បន្ទាប់ពីលោក បៃដិន ជួបជាមួយប្រធានាធិបតីអ៊ុយក្រែនវ្ល៉ាឌីមៀរ ហ្សេលេនស្គី នៅសេតវិមានសម្រាប់កិច្ចពិភាក្សាទ្វេភាគី៕

ប្រែសម្រួល៖ Vann Vann

ប្រភព៖ Sputnik

ចុចអាន៖ អាមេរិក នឹងប្រកាសជំនួយយោធា ៣២៥លានដុល្លារ ឲ្យអ៊ុយក្រែន អំឡុងពេលលោក ហ្សេលេនស្គី ធ្វើទស្សនកិច្ចទីក្រុង វ៉ាស៊ីនតោន