រុស្ស៊ី ព្យាករណ៍ពីភាពតានតឹងរវាង ប៉ូឡូញ និងអ៊ុយក្រែន ក្រោយការប្រកាស​ឈប់ផ្ដល់អាវុធឲ្យទីក្រុងកៀវ

អ្នកនាំពាក្យវិមានក្រឹមឡាំង លោក Dmitry Peskov បានចេញការព្យាករណ៍ពាក់ព័ន្ធទៅនឹងភាពតានតឹងថ្មីៗនេះរវាងប្រទេសប៉ូឡូញ និងអ៊ុយក្រែន បន្ទាប់ពីរដ្ឋាភិបាលទីក្រុងវ៉ាសូវីប្រកាសនឹងលែងផ្ដល់អាវុធឲ្យរដ្ឋាភិបាលទីក្រុងកៀវ ។

ទាក់ទិននឹងរឿងរ៉ាវនេះដែរ អ្នកនាំពាក្យវិមានក្រឹមឡាំងបានព្យាករណ៍ថា ភាពតានតឹងរវាងប្រទេសប៉ូឡូញ និងអ៊ុយក្រែន នឹងកាន់តែកើនឡើងខ្លាំងទៅៗ ហើយនឹងអូសទាញបណ្ដាប្រទេសសហភាពអឺរ៉ុបផ្សេងទៀតឲ្យចូលរួមក្នុងបញ្ហានេះផងដែរ ។

លោក Peskov បានប្រាប់អ្នកសារព័ត៌មានថា “បច្ចុប្បន្នយើងឃើញមានភាពតានតឹងកើតឡើងរួចទៅហើយរវាងទីក្រុងវ៉ាសូវី និងទីក្រុងកៀវ ហើយយើងព្យាករណ៍ថា ភាពតានតឹងទាំងនេះនឹងបន្តកើនឡើង ហើយកាន់តែខ្លាំងទៅៗផងដែរ ខណៈរដ្ឋអឺរ៉ុបផ្សេងទៀតក៏អាចនឹងឈានជើងចូលក្នុងបញ្ហានេះដូចគ្នា ព្រោះវានឹងចៀសមិនរួចឡើយ” ។

កាលពីថ្ងៃពុធ នាយករដ្ឋមន្ត្រីប៉ូឡូញលោក Mateusz Morawiecki បាននិយាយថា ប្រទេសរបស់លោកនឹងលែងផ្គត់ផ្គង់អាវុធដល់អ៊ុយក្រែនទៀតហើយ ដោយរដ្ឋាភិបាលទីក្រុងវ៉ាសូវីនឹងងាកមកផ្តោតសំខាន់លើសន្តិសុខក្នុងប្រទេសខ្លួនឯងវិញ ។

ជាការឆ្លើយតប សមាជិកសភាអ៊ុយក្រែនលោក Mykola Kniazhytskyi បាននិយាយការពារថា ប្រទេសប៉ូឡូញនឹងមិនងាករេចេញពីការផ្គត់ផ្គង់អាវុធដល់អ៊ុយក្រែនឡើយ ហើយពួកគេនឹងនៅតែបន្តការគាំទ្រដល់រដ្ឋាភិបាលទីក្រុងកៀវ ។

ទោះយ៉ាងណា ថ្លែងលើការកត់សម្គាល់នេះ អ្នកនាំពាក្យរដ្ឋាភិបាលប៉ូឡូញលោក Piotr Muller បានបញ្ជាក់ថា ប្រទេសប៉ូឡូញកំពុងផ្គត់ផ្គង់សព្វាវុធដល់អ៊ុយក្រែនសម្រាប់កិច្ចសន្យាដែលនៅសេសសល់ និងបានព្រមព្រៀងកាលពីលើកមុនប៉ុណ្ណោះ ហើយបន្ទាប់ពីវាអស់សុពលភាព អ្វីគ្រប់យ៉ាងអាចនឹងកើតមានឡើងដូចការបញ្ជាក់របស់លោកនាយករដ្ឋមន្ត្រីក៏ថាបាន ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ ហេតុអ្វីលោក Zelensky មិនបានជួបតទល់មុខគ្នាជាមួយរដ្ឋមន្ត្រីការបរទេស រុស្ស៊ី នៅកិច្ចប្រជុំ UN?