អ៊ីស្រាអែល​ ដាក់ប្រទេសក្នុង គ្រាមានសង្គ្រាម ក្រោយក្រុម Hamas បាញ់រ៉ុកកែតជាង ៥០០០គ្រាប់

កងកម្លាំងការពារជាតិអ៊ីស្រាអែល បានប្រកាសថា ខ្លួនកំពុងកៀរគរទាហាន និងប្រកាសដាក់ប្រទេសក្នុងស្ថានភាពមានសង្គ្រាម។ ស្របពេលជាមួយគ្នានោះ ទាហាន​បម្រុង ​ក៏​ត្រូវ​បានកៀរគរផង​ដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោធាបាន​ប្រកាសបែបនេះ ​បន្ទាប់ពី​ក្រុម​សកម្មប្រយុទ្ធ​ឥស្លាម​ Hamas ​បាញ់រ៉ុកកែតជាង ៥០០០គ្រាប់ ​ចូល​ក្នុង​ប្រទេសអ៊ីស្រាអែល ​កាលពី​ព្រឹក​ថ្ងៃ​សៅរ៍ទី៧ខែតុលា។

កងកម្លាំងនៅក្នុងប្រទេស បានបញ្ជាឲ្យប្រជាពលរដ្ឋត្រូវនៅក្នុងផ្ទះ បន្ទាប់ពីប្រកាសថា ក្រុមសកម្មប្រយុទ្ធ Hamas បានសម្រុកចូលប្រទេសហើយ នៅតាមទីតាំងជាច្រើន ជិតព្រំដែនហ្គាហ្សាភាគខាងត្បូងប្រទេសអ៊ីស្រាអែល។

ទន្ទឹមនោះ មេបញ្ជាការយោធាកំពូល Hamas លោក Mohammed Deif បាននិយាយថា ប្រតិបត្តិការ “ព្យុះ​ Al-Aqsa” គឺជាការប្រកាសថា “គ្មានការអត់ឱនទៀតហើយ” ខណៈលោកបានជំរុញឲ្យប៉ាឡេស្ទីន ក្រោកឡើងប្រឈមមុខជាមួយនឹងអ៊ីស្រាអែល។

ដោយឡែក នៅក្នុងសេចក្តីថ្លែងការណ៍មួយដែលបង្ហោះលើឆានែល Telegram, ក្រុម Hamas បានអំពាវនាវឲ្យអ្នកប្រយុទ្ធតស៊ូនៅតំបន់ West Bank ក៏ដូចជានៅប្រទេសឥស្លាមនិងអារ៉ាប់ផងដែរ ត្រូវចូលរួមប្រយុទ្ធក្នុងសមរភូមិ។

ក្រោយការបាញ់រ៉ុកកែតភ្លាមៗ ការិយាល័យនាយករដ្ឋមន្ត្រីអ៊ីស្រាអែល លោក Benjamin Netanyahu បានប្រកាសកោះប្រជុំប្រធានសន្តិសុខ ដើម្បីចាត់វិធានការឆ្លើយតប។

រីឯសេចក្តីថ្លែងការណ៍របស់កងទ័ពអ៊ីស្រាអែលបាននិយាយថា ក្រុម Hamas នឹងប្រឈមមុខ ផលវិបាក និងការទទួលខុសត្រូវចំពោះព្រឹត្តិការណ៍ទាំងនេះ ហើយអ៊ីស្រាអែល បានចាប់ផ្តើមវាយប្រហារគោលដៅនៅតំបន់ហ្គាហ្សាជាការឆ្លើយតប៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ ក្រុមហាម៉ាស់ បាញ់រ៉ុកកែតរាប់ពាន់គ្រាប់ ដាក់អ៊ីស្រាអែល ក្នុងការវាយប្រហារយ៉ាងភ្ញាក់ផ្អើល