ក្រុមហ៊ុន Amazon បាញ់បង្ហោះផ្កាយរណបអ៊ីនធឺរណិតដំបូងបំផុត ប្រជែងជាមួយ SpaceX

ក្រុមហ៊ុន Amazon បានចូលរួមប្រណាំងប្រជែងជាផ្លូវការជាមួយក្រុមហ៊ុន SpaceX និងប្រព័ន្ធ Starlink របស់មហាសេដ្ឋី Elon Musk ដោយបាញ់បង្ហោះផ្កាយរណបដំបូងបំផុតរបស់ខ្លួនទៅកាន់លំហ ដើម្បីផ្គត់ផ្គង់អ៊ីនធឺរណិតល្បឿនលឿនទូទាំងពិភពលោក។

ផ្កាយរណបគំរូ២ដំបូងរបស់ក្រុមហ៊ុន Amazon ដែលមានឈ្មោះថា Project Kuiper បានបាញ់បង្ហោះនៅលើរ៉ុក្កែត United Launch Alliance ពីរដ្ឋ ហ្លរីដា (Florida) កាលពីម៉ោង ២:០៦នាទី រសៀលថ្ងៃសុក្រ ទី៦ ខែតុលា ឆ្នាំ២០២៣។

បេសកកម្មនេះមានគោលបំណងសាកល្បងផ្នែកបច្ចេកវិទ្យាដំបូងបង្អស់របស់ក្រុមហ៊ុន Amazon នៅក្នុងលំហ ខណៈដែលក្រុមហ៊ុនពាណិជ្ជកម្មអេឡិចត្រូនិក និងសេវាកម្មគេហទំព័រយក្សនេះសម្លឹងមើលការពង្រាយផ្កាយរណបចំនួន ៣,២៣៦បន្ថែមទៀតក្នុងរយៈពេលប៉ុន្មានឆ្នាំខាងមុខ ព្រមទាំងត្រៀមផ្តល់សេវាអ៊ីនធឺរណេតល្បឿនលឿនទូទាំងពិភពលោក ដែលក្រុម SpaceX របស់ Elon Musk ធ្លាប់ផ្គត់ផ្គង់នាពេលកន្លងមក។

ប្រសិនបើបេសកកម្មជោគជ័យ ក្រុមហ៊ុន Amazon អាចបង្កើតបណ្តាញផ្កាយរណបរាប់ពាន់នៅទូទាំងពិភពលោក ដែលនឹងបញ្ជូនបណ្តាញអ៊ីនធឺណេតមកកាន់ផែនដីកាន់តែប្រសើរ។ នៅក្នុងគម្រោង Kuiper នេះដែរក្រុមហ៊ុនបានវិនិយោគទឹកប្រាក់ចំនួន ១០ពាន់លានដុល្លារអាមេរិក៕

ប្រែសម្រួល៖ សន្យា

ប្រភព៖ ​CNN

ចុចអាន៖ នៅសិង្ហបុរី អ្នកត្រូវចំណាយលុយជាង១០ម៉ឺនដុល្លារ ដោយគ្រាន់តែដើម្បីទទួលបានសិទ្ធិ ជាម្ចាស់រថយន្ត