ឥទ្ធិពលសង្គ្រាមហាម៉ាស់-អ៊ីស្រាអែល! បុរសវ័យចំណាស់ ចាក់២៦កាំបិត សម្លាប់ក្មេងប្រុសមូស្លីមអាយុ៦ឆ្នាំ នៅអាមេរិក

បុរសអាយុ៧១ឆ្នាំនៅទីក្រុង Chicago បានស្រែកថា “អ្នកកាន់សាសនាឥស្លាមត្រូវតែស្លាប់” មុនពេលចាក់​ក្មេងប្រុស​អាមេរិក-ប៉ាឡេស្ទីនអាយុ៦ឆ្នាំស្លាប់ ហើយបណ្តាលឲ្យម្តាយរបស់គាត់អាយុ៣២ឆ្នាំរងរបួស នៅក្នុងសោកនាដកម្មដែលទទួលឥទ្ធិពលពីសង្គ្រាមហាម៉ាស់-អ៊ីស្រាអែល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កុមារា Wadea Al-Fayoume ត្រូវបានប្រកាសថា ស្លាប់នៅមន្ទីរពេទ្យ បន្ទាប់ពីបុរសវ័យចំណាស់ឈ្មោះ Joseph M. Czuba ចាក់ចំនួន ២៦កាំបិត។ នេះបើយោងតាមការធ្វើកោសល្យវិច័យកាលពីថ្ងៃអាទិត្យទី១៥ខែតុលា។

ការិយាល័យតម្រួតតំបន់ Will County បាននិយាយនៅក្នុងសេចក្តីថ្លែងការណ៍មួយថា “អ្នកស៊ើប​អង្កេត អាចកំណត់​បានថា ជនរងគ្រោះទាំងពីរនាក់នៅក្នុងការវាយប្រហារដ៏ឃោរឃៅនេះ បានក្លាយជាគោលដៅរបស់ជនសង្ស័យ ដោយសារតែពួកគេជាជនមូស្លីម និងដោយសារជម្លោះមជ្ឈិមបូព៌ា ដែលកំពុងបន្តពាក់ព័ន្ធក្រុម​ហាម៉ាស់និងអ៊ីស្រាអែល”។

ប៉ូលិស​បាន​ចោទប្រកាន់​ជនដៃដល់​ពី​បទ​ឃាតកម្ម​កម្រិត​ទី​១ ប៉ុនប៉ង​មនុស្ស​ឃាត​កម្រិត​ទី​១ ឧក្រិដ្ឋកម្ម​ស្អប់​ខ្ពើម២​ករណី និង​មាន​ស្ថាន​ទម្ងន់ទោស​ដោយ​អាវុធ​បណ្តាលឲ្យមនុស្សស្លាប់។

ស្របពេលជាមួយគ្នានោះ លោកប្រធានាធិបតី ចូ បៃដិន ក៏បានធ្វើអត្ថាធិប្បាយអំពីការស្លាប់នេះផងដែរ ដោយនិយាយថា “នៅអាមេរិក គ្មានកន្លែងសម្រាប់ការស្អប់ខ្ពើមនរណាម្នាក់នោះទេ”៕

ប្រែសម្រួល៖ Vann Vann

ប្រភព៖ Daily Mail