ថៃ ដឹកពលរដ្ឋខ្លួន ១៣០នាក់ទៀត ចេញពី អ៊ីស្រាអែល

ក្រុមទី៤នៃជនជាតិថៃចំនួន១៣០នាក់ ដែលដឹកតាមយន្តហោះរបស់កងទ័ពថៃ Airbus 340-500 ចេញពីប្រទេសអ៊ីស្រាអែល បានមកដល់អាកាសយានដ្ឋានដុនមឿង នៃទីក្រុងបាងកកហើយ កាលពីព្រឹកថ្ងៃចន្ទទី១៦ខែតុលា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បុរស១២៧នាក់ ស្ត្រី២នាក់ និងក្មេងស្រីអាយុ៥ឆ្នាំម្នាក់ បានឆ្លងកាត់ការត្រួតពិនិត្យផ្នែកអន្តោប្រវេសន៍ និងវេជ្ជសាស្ត្រនៅអាកាសយានដ្ឋាន មុនពេលបញ្ជូនទៅវិទ្យាស្ថានជំងឺឆ្លង Bamrasnaradura ដើម្បីពិនិត្យរាងកាយ។ បន្ទាប់​មក ​ពួក​គេ​នឹង​ត្រូវ​​អនុញ្ញាតឲ្យវិល​ត្រលប់​ទៅស្រុក​កំណើត​រៀងៗខ្លួន​។

ក្នុង​ចំណោម​អ្នកទាំងនោះ មានម្នាក់​ត្រូវរបួស​ជើង និង​បាក់​ដៃ ហើយ​​ទទួល​ការ​វះ​កាត់។ ប្រាំនាក់ផ្សេងទៀតមានជំងឺផ្តាសាយ ប៉ុន្តែធ្វើតេស្តអវិជ្ជមានជំងឺកូវីដ១៩។

រដ្ឋមន្ត្រីក្រសួងការពារជាតិ Sutin Klungsang បានទៅទទួលស្វាគមន៍អ្នកទាំងអស់ ហើយជើងហោះហើរបន្ទាប់របស់កងទ័ពអាកាស ដើម្បីទៅទទួលយកជនជនជាតិថៃបន្ថែមទៀត នឹងធ្វើឡើងនៅថ្ងៃពុធទី១៨ខែតុលា។

សូមបញ្ជាក់ ជនជាតិថៃជាង៧០០០នាក់ បានដាក់ពាក្យសុំធ្វើមាតុភូមិនិវត្តន៍។ ជនជាតិថៃ ២៨នាក់ត្រូវគេជឿថាបាត់បង់ជីវិតនិង១៧នាក់ កំពុងត្រូវបានក្រុមហាម៉ាស់ ឃុំឃាំង៕

ប្រែសម្រួល៖ Vann Vann

ប្រភព៖ Thai PBS

ចុចអាន៖ អ៊ីស្រាអែល វាយប្រហារអាកាស បាក់អគារ សង្កត់មនុស្សជាង១០០០នាក់ នៅហ្គាហ្សា