អាមេរិក ឲ្យ អ៊ីស្រាអែល ផ្អាកប្រយុទ្ធគ្នាដើម្បីផ្ដល់ជំនួយមនុស្សធម៌ តែលោក Netanyahu បដិសេធ

រដ្ឋមន្ត្រីការបរទេសអាមេរិក លោក Antony Blinken បានប្រាប់មេដឹកនាំអ៊ីស្រាអែលថា លោកមានការព្រួយបារម្ភអំពីការស្លាប់ និងរបួសរបស់ជនស៊ីវិលនៅតំបន់ហ្គាហ្សាស្ទ្រីប ដូច្នេះលោកជំរុញឲ្យនាយករដ្ឋមន្ត្រី Benjamin Netanyahu ការពារពលរដ្ឋប៉ាឡេស្ទីន និងផ្អាកការប្រយុទ្ធគ្នាដើម្បីមនុស្សធម៌ ។

លោក Blinken ដែលកំពុងបំពេញទស្សនកិច្ចលើកទី ៣ ទៅកាន់ប្រទេសអ៊ីស្រាអែល ចាប់តាំងពីក្រុមសកម្មប្រយុទ្ធហាម៉ាសបើកការវាយប្រហារដ៏គួរឲ្យភ្ញាក់ផ្អើលកាលពីខែមុនបាននិយាយថា “យើងដឹងច្បាស់ពីអ្វីដែលអ៊ីស្រាអែលបើកការប្រយុទ្ធដើម្បីកម្ចាត់ក្រុមហាម៉ាស ហើយវាជារឿងត្រឹមត្រូវ និងស្របច្បាប់ដែលត្រូវធ្វើ”។

ប៉ុន្តែលោក Blinken មិនបានឃើញការផ្អាកការប្រយុទ្ធគ្នាដើម្បីផ្ដល់ជំនួយមនុស្សធម៌ដែលលោកបានរំពឹងទុកនោះទេ ។ កង​កម្លាំង​អ៊ីស្រាអែល​បាន​បន្ត​ការ​វាយ​ប្រហារ​របស់​ពួក​គេ​លើ​តំបន់ហ្គាហ្សាស្ទ្រីបតាមដីគោក សមុទ្រ និង​អាកាស ជាពិសេសពួកគេ​​កំពុង​បំផ្លាញ​ផ្លូវ​រូង​ក្រោម​ដី​ដែល​ប្រើ​ដោយ​យុទ្ធជន​ហាម៉ាសផងដែរ ។

ឆ្លើយតបទៅកាន់រដ្ឋមន្ត្រីការបរទេសអាមេរិក, លោក Netanyahu បាននិយាយថា “ខ្ញុំបានបញ្ជាក់យ៉ាងច្បាស់ហើយ យើងនឹងបន្តវាយប្រហារឲ្យអស់ពីកម្លាំងកាយចិត្តរបស់យើង ហើយការបដិសេធរបស់អ៊ីស្រាអែលលើបទឈប់បាញ់បណ្តោះអាសន្ន ដោយសារតែមិនមានការដោះលែងចំណាប់ខ្មាំងតាមការចង់បានរបស់យើងឡើយ” ។

ក្រុមសកម្មប្រយុទ្ធហាម៉ាសបានចាប់ឃុំខ្លួនមនុស្សរាប់រយនាក់នៅក្នុងការវាយប្រហាររបស់ពួកគេកាលពីថ្ងៃទី៧ ខែតុលា ខណៈសមាជិកគ្រួសារនៃអ្នកចាប់ពង្រត់បាននាំគ្នាដើរតាមដងផ្លូវដើម្បីអង្វរឲ្យមានដោះលែងពួកគេត្រឡប់មកវិញដោយសុវត្ថិភាព ។

គួរបញ្ជាក់ថា ភាពតានតឹងថ្មីដែលបានផ្ទុះឡើងនៅមជ្ឈិមបូព៌ាបានអូសបន្លាយពេលជិត ១ ខែទៅហើយ បន្ទាប់ពីក្រុមហាម៉ាស់បានបើកការវាយប្រហារមកលើទឹកដីអ៊ីស្រាអែលចេញពីតំបន់ហ្គាហ្សាស្ទ្រីបកាលពីព្រឹកព្រលឹមថ្ងៃទី៧ ខែតុលា ដោយបានសម្លាប់មនុស្សជាង ១,៥០០ នាក់ ដែលភាគច្រើនជាជនស៊ីវិល ។

ចំណែកនៅតំបន់ហ្គាហ្សាវិញ ក្រសួងសុខាភិបាលដែលគ្រប់គ្រងដោយក្រុមហាម៉ាស់បាននិយាយថា ការឆ្លើយតបរបស់អ៊ីស្រាអែលបានសម្លាប់មនុស្សជិត ១ ម៉ឺននាក់ និងលើស ៣២,០០០ នាក់ រងរបួស ខណៈប្រជាជន ២.៣ លាននាក់កំពុងខ្វះជំនួយមនុស្សធម៌ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ អ៊ីស្រាអែល ចោទ ក្រុមហាម៉ាស ថា យកស្ត្រី និងកុមារជាង ១០០ នាក់ធ្វើជា​ខែលការពារ