បង្ហាញមុខជនសង្ស័យម្នាក់ ដែលបាញ់សម្លាប់ DJ​ ខណៈពេល​ផ្សាយ​ផ្ទាល់​នៅ ​ហ្វីលីពីន

លោក Juan Jumalon ដែលគេស្គាល់ថាជា DJ Johnny Walker ត្រូវបានបាញ់សម្លាប់ ខណៈពេលផ្សាយផ្ទាល់នៅ ហ្វីលីពីន ។

ហេតុការណ៍នេះដែរ បានកើតឡើងកាលពីថ្ងៃអាទិត្យ ទី៥ ខែវិច្ឆិកា នៅស្ទូឌីយ៉ូក្នុងផ្ទះរបស់គាត់តែម្ដង ចំពេលលោកកំពុងផ្សាយផ្ទាល់លើ Facebook វេលាម៉ោង ៥ និង ៣០ នាទីព្រឹក (ម៉ោងហ្វីលីពីន) ។

គួរឲ្យដឹងថា ជនសង្ស័យមានគ្នា ២ នាក់ និងធ្វើសកម្មភាពដោយប្រើកាំភ្លើងខ្លីម្នាក់ ១ ដើម ។ ដំបូង ឃាតកសុំចូលផ្ទះដោយកុហកថា “មានរឿងសំខាន់ចង់ប្រកាសក្នុងការផ្សាយផ្ទាល់” បន្ទាប់មកពួកគេបានចូលទៅបាញ់សម្លាប់លោក Jumalon នៅក្នុងស្ទូឌីយ៉ូ ។ ភ្លាមៗនោះ ភរិយាជនរងគ្រោះបាននាំគាត់ទៅពេទ្យសង្គ្រោះបន្ទាន់ដែរ ប៉ុន្តែលោក Jumalon ដាច់ខ្យល់ស្លាប់បាត់ទៅហើយ ។

ការផ្សាយរបស់លោក Jumalon ផងដែរ បានចាក់ផ្សាយនៅលើទំព័រ Facebook 94.7 Gold FM Calamba ដែលមានអ្នកតាមដានប្រហែល ៣ ០០០ នាក់ ។

សហភាពអ្នកកាសែតជាតិហ្វីលីពីនបាននិយាយថា ចាប់តាំងពីលោក Bongbong Marcos ឡើងកាន់តំណែងជាប្រធានាធិបតីមក អ្នកកាសែត ៤ នាក់ត្រូវគេបាញ់សម្លាប់ ។

ពាក់ព័ន្ធនឹងករណីបាញ់សម្លាប់ខាងលើ អង្គការមិនរកប្រាក់ចំណេញ Freedom House ដែលមានមូលដ្ឋាននៅសហរដ្ឋអាមេរិកបាននិយាយថា ប្រទេសហ្វីលីពីន គឺជាកន្លែងគ្រោះថ្នាក់បំផុតមួយនៅក្នុងពិភពលោកសម្រាប់អ្នកសារព័ត៌មាន ៕

ប្រែសម្រួល៖ វារី

ប្រភព៖ CNN

ចុចអាន៖ អ្នកកាសែត ៣១នាក់ ស្លាប់ពេលយកព័ត៌មាន សង្គ្រាមអ៊ីស្រាអែល-ហាម៉ាស់