នាយករដ្ឋមន្ត្រី ប៉ាឡេស្ទីន អង្វរករឲ្យបញ្ចប់ជម្លោះនៅមជ្ឈិមបូព៌ា

ក្នុងជំនួបជាមួយលោក Emmanuel Macron ប្រធានាធិបតីបារាំងនៅទីក្រុងប៉ារីសកាលពីថ្ងៃព្រហស្បតិ៍, នាយករដ្ឋមន្ត្រីប៉ាឡេស្ទីនលោក Mohammad Shtayyeh បានអង្វរករឲ្យមានការបញ្ចប់ជម្លោះដែលកំពុងបន្តក្ដៅគគុកនៅមជ្ឈិមបូព៌ា ឲ្យបានឆាប់តាមដែលអាចធ្វើទៅបាន ។

លោក Shtayyeh បាននិយាយនៅក្នុងសន្និសីទអន្តរជាតិស្តីពីជំនួយមនុស្សធម៌សម្រាប់តំបន់ហ្គាហ្សាដែលត្រូវបានឡោមព័ទ្ធដោយអ៊ីស្រាអែលថា “យើងត្រូវតែបញ្ចប់សង្រ្គាម និងការកាន់កាប់នៅតំបន់ហ្គាហ្សា ជាពិសេសយើងត្រូវតែបញ្ចប់ការផ្លាស់ទីលំនៅរបស់ប្រជាជនក្នុងតំបន់” ។

លោកនាយករដ្ឋមន្ត្រីបានលើកឡើងថា “ប្រជាជនប៉ាឡេស្ទីនត្រូវការការការពារពីសហគមន៍អន្តរជាតិនៅក្នុងតំបន់ហ្គាហ្សា ទីក្រុង Jerusalem និងនៅតំបន់ West Bank ហើយលោកសូមអំពាវនាវដល់សហគមន៍អន្តរជាតិឲ្យនៅឆ្ងាយពីគោលនយោបាយស្តង់ដារពីរនេះ ព្រោះថា ការសម្លាប់កុមារមិនមែនជារឿងត្រឹមត្រូវឡើយ” ។

ទន្ទឹមនោះ លោក Shtayyeh បានកត់សម្គាល់ថា ការរងទុក្ខវេទនារបស់ប្រជាជនប៉ាឡេស្ទីនមិនមែនទើបតែចាប់ផ្តើមពីថ្ងៃទី៧ ខែតុលានោះទេ ប៉ុន្តែគឺកាលពី ៧៥ ឆ្នាំមុនមកម្ល៉េះ ហើយលោកសង្ឃឹមលើតុលាការអន្តរជាតិនឹងមានការអនុម័តជំហរច្បាស់លាសដើម្បីកាត់ក្ដីលើឧក្រិដ្ឋជន ។

ស្របពេលជាមួយគ្នានេះ លោកនាយករដ្ឋមន្ត្រីក៏បានបញ្ជាក់ផងដែរថា “ច្បាប់មនុស្សធម៌អន្តរជាតិត្រូវតែអនុវត្តចំពោះអ្នកទាំងអស់គ្នា ហើយយើង​ត្រូវ​ចាត់​វិធានការ​សមស្របដើម្បី​បញ្ចប់​ឧក្រិដ្ឋកម្ម​​ដែល​កំពុង​ប្រព្រឹត្ត​ទៅ​លើ​ប្រជាជន​ប៉ាឡេស្ទីននៅតំបន់ហ្គាហ្សា” ។

អ៊ីស្រាអែលបាននិងកំពុងបង្កើនសកម្មភាពយោធារបស់ខ្លួន រួមទាំងការវាយប្រហារតាមអាកាស ប្រតិបត្តិការជើងគោក និងការទម្លាក់គ្រាប់បែក ជាពិសេសនៅតំបន់ភាគខាងជើងនៃតំបន់ហ្គាហ្សាស្ទ្រីប ជាកន្លែងដែលកងរថក្រោះរបស់អ៊ីស្រាអែលកំពុងរុលចូលទៅមុខ ។

យោងតាមក្រសួងសុខាភិបាលនៅតំបន់ហ្គាហ្សាបានឲ្យដឹងថា ជនស៊ីវិលជាង ១០,០០០ នាក់ត្រូវបានសម្លាប់ រួមទាំងកុមារជាង ៤,៤០០ នាក់ ចាប់តាំងពីជម្លោះថ្មីបានផ្ទុះឡើងកាលពីថ្ងៃទី៧ ខែតុលា បន្ទាប់ពីការវាយប្រហារឆ្លងព្រំដែនចូលអ៊ីស្រាអែលពីសំណាក់ក្រុមហាម៉ាស ដោយបានសម្លាប់មនុស្សជាង ១,៦០០ នាក់ ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ ប៉ាឡេស្ទីន អំពាវនាវដល់មេដឹកនាំពិភពលោកឲ្យប្រាប់ អ៊ីស្រាអែល បញ្ឈប់​សង្គ្រាមឥឡូវនេះភ្លាម